БАЧИНЦИ – Зоз пригодну програму хтору порихтали КПД „Драґутин Драґен Колєсар“ и Подручна канцелария Националного совиту Руснацох, вчера, 15. януара у малей сали Дома култури означене националне швето Руснацох.
Програму отворели шпивацки ґрупи КПД „Дюра Киш“ и КПД „Драґутин Драґен Колєсар“ зоз державну гимну „Боже правде“ и шветочну шпиванку Руснацох „Браца Русини“, потим ше представели зоз венчиком руских народних шпиванкох, а на концу и зоз шпиванку „Тайна винове лозе“.
Парох о. Дарко Рац з тей шветочней нагоди визначел же значне кед ше Руснаци сходза, и кед слово о култури и просвити, а окреме у духовноци бо Бог нас вец зачува, а коренї Руснацох у тим сримским валалє досц глїбоки.
Окрем историйних податкох о присельованю на тоти простори здогадло ше и на значни мена з прешлосци валалу, як цо то Кирил Драгобецки и Михал Папуґа, хтори були члени РНПД, потим Драґутин Драґен Колєсар, ґлумец и режисер чийо мено ноши Дружтво, академик Владимир Ковач, познати енолоґ, Ирина Папуґа, секретарка Дружтва за руски язик, литературу и културу, хтора писала о Бачинцох и значно допомагала у просвити и култури валала, новинарка Мартица Тамаш, Олена Папуґа и други.
Зоз колядами и писнями ше представели школяре Александар и Милица Орещанин, а на ґушлї ше представела школярка другей класи Анастасия Антич Дуйкович зоз „Успаванку“ и „Алеґром“.
Ирина Папуґа бешедовала о просвитним живоце у валалє, а тиж и подаровала кнїжки КПД „Драґутин Драґен Колєсар“.
Програму окрем представнїкох локалней самоуправи провадзели и о. Михайло Режак, парох зоз Шиду, домашнї парох о. Дарко Рац и други, а после урядовей програми друженє предлужене на коктелу з музику, шпиванку и танцом.