РУСКИ КЕРЕСТУР – У рамикох 56. Драмского мемориялу Петра Ризнича Дядї, внєдзелю, 14. априла бул отримани и перши тогорочни вечар ювилантох наволани „Наша Ирин”, пошвецени рускей реномованей ґлумици, режисерки и писательки, Ирини Гарди Ковачевич, котра того року преслави свой ювилейни 80. родзени дзень.
У опущеней розгварки зоз руменцовим чайом, котру водзел директор РНТ „Петро Ризнич Дядя” Славко Орос, Ирина Гарди Ковачевич мала нагоду представиц свою улогу на рускей драмскей сцени од самого початку, давного 1965. року по нєшка, а на концу шмело нагадли и плани за будуци реализациї.
Публика мала нагоду упознац Ковачевичову през улоги котри одбавела у своєй богатей кариєри, през дїла котри режирала и котри самостойно написала.
На початку ювилантка одбавела кратку драмску сличку зоз славней представи „Жовта”, у котрей вона ношела насловну улогу. Ґлумци зоз представи Метаморфози виведли два сонґи з котрима отворени и заварти тот вечар, понеже Ковачевичова подписує шицки тексти сонґох зоз спомнутей представи.
