РУСКИ КЕРЕСТУР – На нєдзелю, 29. септембра по першираз у Руским Керестуре будзе отримана Манифестация „Стретнуца валалох на Михалово лєто”, а на тот завод означи ше и 190-рочнїца од снованя Здруженя ремеселнїкох.
Манифестация будзе отримана у центру валала, точнєйше, опрез Младежского дому, а отверанє заказане на 15 годзин.
Стретнуца валалох почню зоз Саймом старих алатох и старих ремеслох, кед керестурски майстрове буду практично, през роботнї, презентовац стари ремесла хтори покус уж и забути.
Потим, на 16 годзин будзе шветочне отверанє Манифестациї, а од 16 годзин и 30 минути заказана културно-уметнїцка програма хтору пририхтаю члени Дома култури. Наступя три фолклорни дзецински ґрупи, хтори ше з тей нагоди публики представя зоз шпиванками, а нє танцом понеже бина нє будзе досц велька же би витримала їх численосц, а свой наступ потвердзели и госци зоз Словацкей, ансамбл „Барвенок”.
Присутних з музику забави и керестурски бенд „Касиус” у составе – Иван Планчак, Иґор Папуґа, Стефан Колошняї и Борис Жирош, а свою 10-минутову точку на фуяри будзе мац и Сашо Палєнкаш.
Покровитель манифестациї Министерство за бриґу о валалу, а орґанизаторе Туристична орґанизация Кула и Месна заєднїца Руски Керестур.