10. АВҐУСТ – На нєшкайши дзень у Руским Керестуре почало оправянє старей рускей хижи.
1814 – Народзел ше снователь швайцарскей фирми Нестле (Nestlé) Гайнрих Нестле (Франфрукт на Майни 10. авґуст 1814 – Ґлио, Швайцарска, 7. юлий 1890), творец є и першей млєчней чоколади.
1878 – Сербски княз Милан Обренович видал указ о устройстве Воєного музею пре зазберованє и чуванє трофейох зоз войновей историї. Музей змесцени до преправеней джамиї на платоу Горнього городу Беоґрадскей твердинї на Калемеґдану.
1889 – Народзел ше Чарлс Брейс Дароу (Пенсилвания, ЗАД, 10. авґуст 1889 – 28. авґуст 1967), хтори видумал дружтвене бависко Монопол.
1895 – У Кралїцовим голу у Лондону виведзени перши променадни концерт.
1948 – На америцкей телевизийней програми Ей Би Си премиєрно приказана емисия Алена Фанта Скрита камера.
1964 – Папа Павло Шести принєсол свою першу енциклику о помиреню зоз другима християнскима церквами, нєхристиянскима вирскима заєднїцами и порихтаносци на диялоґ зоз шицкима хтори тото жадаю.
2003 – Прейґ специялней вязи медзи жему и Медзинародну вселенску станїцу отримане перше вселенске винчанє у историї чловечества. Повинчали ше русийски космонавт Юрий Малєншенко, хтори у тей хвильки бул у орбити на коло 400 километри над Новим Зеландом, и Єкатерина Дмитриєва, хтора була у вселенским центре у Хюстону.
2017 – У Руским Керестуре почало оправянє старей рускей хижи, а проєкт о реконструкциї пририхтал Покраїнски завод за Защиту памятнїкох. Найстарша руска хижа у власносци Националного совиту Руснацох од 2016. року, а проєкт єй обнови виробени ище 2012. року у сотруднїцтве з Покраїнским заводом. Под защиту держави є од 1965. року, од 1991. року є класификована як културне добро од велького значеня у Войводини.