17. НОВЕМБЕР – На нєшкайши дзень народзела ше подобова уметнїца Ана Колєсар.
1855 – Шкотски виглєдовач Дейвид Ливинґстон пренашол водопади на рики Замбези, хтори наволани по анґлийскей кралїци Викторийово водопади.
1913 – Перши ладї прешли през Панамски канал.
1950 – Народзела ше подобова уметнїца, педаґоґ Ана Колєсар (Нови Сад, 17. новембер 1950 – Канада, 25. априла 2004). Ана Ганча Колєсар закончела Висшу педаґоґийну школу, подобови одсек у Новим Садзе. Робела як наставнїк подобового воспитаня у Степановичеву и Сримскей Каменїци. Од 1987. року жила у Канади перше у Торонту, а потим у Ниаґара Фалс. Була член Здруженя канадских уметнїкох и Здруженя женох уметнїкох у Канади, як и член Клуба подобових уметнїкох Дружтва за руски язик, литературу и културу у Новим Садзе. Участвовала и на вецей колективних виставох у Торонту и Ниаґара Фалс у Канади. Умарла 25. априла 2004. року у Канади, похована є на Алмашским теметове у Новим Садзе.
1970 – Даґлас Енґелберт патентовал перши компютерски миш.
2019 – Реґистровани перши случай инфекциї з коронавирусом, при 55-рочному хлопови зоз китайскей провинциї Хубеи.
Нєшка Медзинародни дзень студентох.