30. ОКТОБЕР – На нєшкайши дзень народзела ше учителька Ирина Олеяр.
1869 – У Беоґрадзе отворени нови будинок Народного театру.
1905 – У Беоґрадзе основане Културно-уметнїцке дружтво Абрашевич, наволане по писательови Костови Абрашевичови.
1918 – Формована Чехословацка, кед Словацка преглашела одвойованє од Мадярскей и зєдинєнє зоз Ческу, як ше розпадла Австро-Угорска. Ческа и Словацка постали самостойни держави 1. януара 1993. року.
1934 – Народзела ше учителька Ирина Олеяр (Руски Керестур, 30. октобер 1934 – Руски Керестур, 27. марец 2025). Основну школу закончела у Руским Керестуре, ґимназию у Вербаше, а учительску школу у Зомборе. Єден час робела у школи у Дюрдьове, а вец ше зоз фамелию преселєла до Руского Керестура дзе була учителька по пензионованє. Учителька Олеярова була активна и ґлумела у театру, велї роки шпивала у хору Дому култури, анґажовала ше и у тедишнїм дружтвено-политичним живоце, найвецей у социялним и образовним секторе, у тедишнїм АФЖ, як делеґат у општинским СИЗ за образованє, була и поротнїк, а допринєсла и отвераню дому за старих и яшелькох у валалє. Учителька Олеярова похована 28. марца на керестурским теметове.
1958 – Народзел ше русински поета, литературни творитель, редактор емисийох на русинским язику Ґабриєл Гатинґер Хлєбашко (Комлошка, 30. октобер 1958 – Будапешт, Мадярска, 26. юлий 2016). Бул aктивиста у русинским руху, редактор емисийох на русинским язику на Радио Будапешту. Бул зачатнїк розвою русинского руху у Мадярскей и перши предсидатель Орґанизациї Русинох у Мадярскей (ОРУМ), хтора ше до активносцох у рамикох Шветового конґресу Русинох/Руснацох/Лемкох (ШК РРЛ) уключела од снованя 1991. року. Гатинґер бул и добри приятель з Руснацами у Сербиї – з нашима писателями, а окреме з членми Рускей матки, на вецей заводи пребувал у нашей жеми, а бул и єден з главних орґанизаторох госцованя тедишнього АРТ Дядя у Комлошки, у Мадярскей стредком 90-тих рокох прешлого вику, з представу Жобрача гора Дюри Папгаргая. Ґабриєл Гатинґер Хлєбашко поховани 1. авґуста у месце Бияторбадь нєдалєко од Будапешту.
1973 – Пущени до транспорту мост на Босфору хтори повязує Европу и Азию.