4. ФЕБРУАР – На нєшкайши дзень у Новим Садзе народзенa проф. др Надежда Ружич.
1930 – Народзени сербски академик Борислав Пекич (Подґорица, 4. фебруар 1930 – Лондон, 2. юлий 1992), бул сценариста и єден з найвекших писательох у сербскей литератури.
1940 – Народзена проф. др Надежда Ружич, дзивоцке презвиско Кочиш, (Нови Сад, 4. фебруар 1940 – Нови Сад, 3. януар 2002), технолоґ-енолоґ, професор Универзитета. Проф. др Надежда Ружич народзена у Новим Садзе, оцец Евґений бул економиста, а мац Амалия з фамелиї Тамаш. У родним варошу закончела основну школу и ґимназию (1959), а дипломовала на Технолоґийним факултету, поживови напрям, технолоґию вина (1963). Маґистерску роботу одбранєла 1970, а докторат 1975, з тему Прилог познаваню сумпор-водонїку у технолоґиї вина. За асистента на Техонолоґийним факултету вибрана є 1964, за доцента 1976, позарядови професор постала 1982, а порядни 1988. року. Руководзела з Катедру за технолоґию вина. Продекан за наставу була 1981–1983, а у двох мандатох проректор Универзитерта за наставу (1987–1991). Була у Риме на фаховим усовершованю у обласци енолоґиї (1963) и на студийним пребуваню у Чехословацкей, Австриї, Французкей и Италиї. На длужносци секретара СИЗ-а за образованє кадрох технїчних и польопривредних фахох у Войводини була 1983–1987 и була член Союзного координацийного одбору за медзинародне културно-просвитне и технїчне сотруднїцтво (1985–1989). Авторка є седем наукових проєктох и технолоґийних ришеньох и авторка новей сорти виновей лози. Обявела два моноґрафиї и єден учебнїк, а найважнєйша єй кнїжка ноши наслов „Вино” (2000). Ношителька є Повелї городу Нового Саду (1980) и добитнїца повельох зоз златну медалю Универзитета (1991) и Технолоґийного факултету (1999).
2003 – Обидва ради югославянского парламента вигласали Уставну повелю и Закон о єй запровадзованю, зоз чим престала исновац Союзна Република Югославия. Нова держава наволана Державна заєднїца Сербия и Чарна Гора (ДЗСЦҐ) и тирвала од 4. фебруара 2003. року по 5. юний 2006. року, понеже 3. юния 2006. року, парламент Чарней Гори преглашел нєзависносц.
2004 – Штирме студенти зоз Гарварду основали интернетску дружтвену мрежу Фейсбук зоз своєй хижи у студентским дому.
Нєшка Медзинародни дзень борби процив рака. Основани є на инициятиву Шветовей здравственей орґанизациї и Медзинародного здруженя за борбу процив рака.
