ВЕРБАС – На нєдавно отриманим ювилейним 25. Сримскокарловским подобовим салону, наш познати подобови уметнїк Владо Няради зоз Вербасу достал трецу награду за свою фотоґрафию.
По Нярадийових словох, слово о фотоґрафиї на гадвабу, зоз назву „Єдна приповедка”, котра зазначена 2021. року. То историйна фотоґрафия за город Вербас и у себе ма вельо символики. На нєй улїчна часц фасади орипаней церковней хижи котра була єдна з найстарших у Вербаше у часу валяня. З отвореним облаком, през хтори видно фиронґу и турню Еванґелистичней церкви, з циньом сухих конарох и уклопенима фарбами нєба и фасади, у фарбох застави бувшей Югославиї, котру тота хижа наджила, потолковал Няради.
По його словох, гоч могол конкуровац на спомнутей вистави и з роботу виведзену у даякей другей технїки, опредзелєл ше за фотоґрафию праве прето же ше з фотоґрафию на виставох нє зявйовал од 2018. року.
Владо Няради потераз бул вецей як дзешец раз наградзовани за фотоґрафию. Самостойно викладал 2002. року у Ґалериї „Форма” хтора при Здруженю применєних уметнїкох и дизайнерох Войводини у Новим Садзе, а находзи ше и у Антолоґиї фотоґрафиї Войводини котру видал Фото и кино союз Войводини 2004. року. Єдна його фотоґрафия ше и того року находзи на вистави у орґанизациї Городского музею у Вербаше.