НОВИ САД – У Новим Садзе ше од 17. мая по штварток 22. май отрима 92. Медзинародни польопривредни саям, на хторим наступя вецей як 1000 викладаче зоз коло 40 жемох, сообщел Новосадски саям.
Того року 92. Медзинародни польопривредни саям, ношитель ознаки „Найлєпше з Войводини”, ма моцну потримовку Италиї як стратеґийного партнера Польопривредного сайма, хтора ше реализує дзекуюци Италиянскей аґенциї за вонкашню тарґовину (ITA/ICE).
Зоз тоту найвекшу аґробизнис подїю: Ґлобус осиґуранє – ґенерални спонзор, Ал Дахра – златни спонзор, Банка Поштанска шпоровня – Банка партнер, Министерство польопривреди, лєсарства и водопривреди, Покраїнска влада зоз секретариятами за польопривреду и привреду, Город Нови Сад и дародавец у дарунок-бависку Компания Ките ДОО.
Нащивителє котри буду мац купени уходнїци буду участвовац у дарунок-бависку, а найщешлївши достанє трактор Джон Дир 5045 Д, друнок Компаниї Ките ДОО, хтора урядови Джон Дир (John Deere) дилер и сервисер у Сербиї.
Того року, нажаль, нє будзе Национална вистава статку пре здравствени околносци у реґиону, а на основи препоруки Управи за ветерину Министерства польопривреди, лєсарства и водопривреди.
Уходнїци буду 800 динари по особи, а мож их купиц и онлайн на ҐиґсТиксу (GigsTix) и на сайту Новосадского сайма, будзе ше их предавац и на касох на уходзе на Саям.
За орґанизовани нащиви уходнїци буду 600 динари по особи, а за орґанизовани нащиви школох и факултетох и пензионерох уходнїци буду 400 динари.
Фамелийни дзень, кед цала фамелия годна войсц за купену єдну уходнїцу од 800 динари будзе стреда 21. май.
Роботни час на Сайму будзе од 9 до 18 годзин.
