БЕОҐРАД – Министерство просвити обявело Календар смотрох и змаганьох за школярох основних школох у школским 2024/2025. року, як и Фахове упутство о орґанизованю змаганьох и смотрох школярох основней и стреднєй школи.
Змаганя и смотри то звонканаставни активносци хтори ше орґанизує з цильом вреднованя и ранґованя знаня, схопносцох и способносцох школяра зоз предмета, односно зоз обласци предмета.
Орґанизатора и термини змаганьох и смотрох одредзує министер зоз Календаром змаганьох и смотрох за кажди школски рок.
Календар смотрох и змаганьох за школярох основних школох за школски 2024/25. рок мож опатриц на тим линку.
Змаганє зоз руского язика и язичней култури орґанизує Дружтво за руски язик, литературу и културу, и школски змаганя маю буц отримани по 1. марец, медзиокружне будзе 5. априла, а републичне змаганє 24. мая 2025. року. Того року домашня школа медзиокружного и републичного змаганя зоз руского язика и язичней култури будзе Основна школа „Йован Йованович Змай” у Дюрдьове, Општина Жабель, Школска управа Нови Сад, а орґанизатор Дружтво за руски язик, литературу и културу, Нови Сад у сотруднїцтве зоз Министерством просвити Републики Сербиї, Беоґрад.
