Ораховски школяре означели 101-рочнїцу од народзеня Штефана Чакана

автор Ол. Папуґа, фото Т. Дудаш
594 Опатрене

НОВЕ ОРАХОВО – Школяре хтори уча руски язик як виборни предмет у Основней школи „18. октобер“ у Новим Орахове, вєдно зоз наставнїцу Таню Дудаш, вовторок 11. априла, -означели 101-рочнїцу од народзеня Штефана Чакана. Нащивели його гроб на руским теметове и улїчку у Орахове хтора ше вола по нїм.

Штефан Чакан, народзени 10. априла 1922. року у Руским Керестуре. Познати є у нашим народзе же попри проф. Гавриїла Г. Надя, др Мафтея Виная, Яши Бакова и других бул єден з перших професорох рускей Ґимназиї 1945. року у Руским Керестуре. Аґроном по фаху, Штефан Чакан бул културни дїяч, новинар, публициста и писатель. Бул редактор дзецинского часопису „Пионирска заградака“, робел у Рускей редакциї Радио Нового Саду як редактор емисийох за валал, а потим, 1972. року прешол до „Руского слова“ у Новим Садзе на место редактора.

Цали свой роботни и животни вик Штефан Чакан, гоч дзе робел и пребувал, нєпреривно и нєвистато писал, алє найвекши успих на литературним полю му вшелїяк басни, з тим вецей же вон затераз наш єдини баснописатель. Обявени му два кнїжки баснох у виданю „Руского слова”. Перша кнїжка Басни вишла 1971. року и за ню достал „Невенову” награду. Друга кнїжка Басни 2 вишла 1986. року.

ПОВЯЗАНИ ТЕКСТИ