НОВЕ ОРАХОВО – На преслави Националного швета Руснацох у Републики Сербиї, всоботу 17. януара, у Доме култури у Новим Орахове, окремне значенє мала промоция кнїжки Вично тирва 13. май, чийо авторе Любо Рац и Олена Папуґа.
Попри авторох, на промоциї бешедовали – спред Месней заєднїци Нове Орахово Гайналка Шипош, спред Општини Бачка Тополя Нимрод Томик як и директор Заводу за културу войводянских Руснацох Сашо Сабадош.
Kнїжка Вично тирва 13. май бешедує о преселєню Руснацох зоз Руского Керестура до Нового Орахова пред точно 80 роками, о надїї за лєпшим животом хтора им понукнута так же им обецана безплатна жем, о розчарованьох и нєправди, алє и о любови, приятельствох, злагоди… Прето датум 17. януар була нагода означиц два ювилеї, и 275 роки од приходу Руснацох до тих крайох, алє и 80 роки од преселєня Руснацох зоз Керестура до Нового Орахова, визначене на промоциї.
На концу, присутним подзелєни безплатни прикладнїки кнїжки.
Видаванє кнїжки Вично тирва 13. май помогли – Завод за културу войводянских Руснацох, Општина Бачка Тополя, Месна заєднїца Нове Орахово и КУД Петро Кузмяк Нове Орахово.
Пред промоцию кнїжки, поставени етно-стол хтори порихтали членїци Активу женох КУД Жатва з Коцура, а як послуженє пририхтани наисце богати стол, вецей як 40 розлични файти, преважно руских старих, єдлох – капущанїки, бобальки, геровци, рондьоши, рейтеши, палачинки, покераї и ище вельо того.
