Побиднїцка екипа на турниру РК Русин

автор Д. Барна
442 Опатрене

РУСКИ КЕРЕСТУР – На кошаркашским терену на пияцу у Руским Керестуре од 20. по 27. авґуст отримани турнир у кошарки 3 на 3, на хторим участвовали 8 екипи.

Найлєпша екипа була РК Русин, у хторей бавели Славко Гербут, Борис Югик, Иван Рац, Филип Орос и Виктор Микита.

Друге место завжала екипа „Comfort Style”, док треци були „sfrj janotrans”.

Титулу найхасновитшoго бавяча (MVP, most valuable players) достал Славко Гербут.

Медзи штирома екипами, у борби за треце место бавела ище екипа „Comfort sdr”, хтора страцела од екипи „sfrj janotrans”.

Концепт турниру бул задумани так же бавел кажде з каждим, а потим ше бавело по плей-оф системи, дзе бавели 1 процив 8, 2 процив 7, 3 процив 6 и 4 процив 5.

Наградни фонд за три першопласовани екипи бул 10.000, 5.000 и 3.000 динари, а тиж побиднїки достали и погари и медалї.

На трецим турниру, хтори отримани на кошаркашским терену на пияцу, кажди вечар пришло красне число публики.

Орґанизаторе тогорочного турниру у кошарки 3 на 3 були Иван Чизмар, Иґор Варґа и Иґор Маньош.

ПОВЯЗАНИ ТЕКСТИ