РУСКИ КЕРЕСТУР – У Майсторским доме вчера вечар почал Мали курс керамики хтори у рамикох нового проєкту з меном „Знанє то моц” орґанизовало Здруженє женох „Байка”. Предсидателька „Байки” Славица Катона привитала присутних и кратко представела проєкт.
Курс тє. роботнї водзела инструкторка Терезия Катона, хтора присутним представела основи роботи зоз глїну и виробок предметох з керамики за каждодньове хаснованє.
Потим коло 20 присутни заинтересовани жени, од старших по младши ґенерациї, мали нагоди опробовац ше практично и учиц направиц дацо зоз глїни. Роботнї ше предлужа же би ше облапел цали тот процес, та шлїдуюца будзе на штварток 18. януара на 18 годзин.
Нови Байков проєкт финансийно потримал Завод за ровноправносц полох.
