РУСКИ КЕРЕСТУР – У орґанизациї фодбалского клуба Русин у Спортскей гали у Руским Керестуре од 30. новембра тирва 2. жимски ноцни турнир у малим фодбалу на хторим почала нокаут фаза.
Першопласовани екипи зоз трох ґрупох и єдна найлєпше другуопласована екипа прешли директно до штварцини финала, док ше другопласовани и трецепласовани екипи розбавйовали за штварцину финала.
Стретнуца ше у ґрупней фази бави два раз по 15 минути, док ше у нокаут фази будзе бавиц два раз по 20 минути.
Внєдзелю 15. децембра бавело ше два сениорски стретнуца 1/8 финала.
Перше стретнуце одбавели Клуб 10 (Руски Керестур) – Горди зла (Червинка) – 1:7. Ґол за керестурску екипу дал Андрей Гарди. До штварцини финала пласовала ше екипа зоз Червинки.
У другим стретнуцу бавели Драґан Ковачевич Дзира (Руски Керестур) – Апартмани Сивчевич Титова вила Златибор (Нови Сад) – 0:2. До штварцини финала пласовала ше екипа зоз Нового Саду.
Пондзелок 16. децембра бавело ше други два сениорски стретнуца 1/8 финала.
Перше стретнуце одбавели БСК (Бачки Брестовец) – Пензионере (Зомбор) – 2:3. Екипа зоз Зомбора ше пласовала до штварцини финала.
У другим стретнуцу бавели Кула – Столарска роботня ҐОД (Обровец) – 2:5. Остатня карта за штварцину финала припадла екипи зоз Обровцу.
Орґанизатор ноцного турнира у малим фодбалу ФК „Русин”.
