Покраїнски секретариєт за спорт и младих розписує конкурси за 2025. рок

автор В. Вуячич
43 Опатрене

НОВИ САД – Покраїнски секретарият за спорт и младих розписує конкурси за 2025. рок, хтори буду тирвац од 3. фебруара по 3. марец, окрем конкурса зоз обласци унапредзеня спортскей инфраструктури, хтори будзе тирвац по 3. април, сообщене зоз Покраїнскей влади.

Ресорни секретар Дане Баста наявел же ше розпише осем конкурси и то у обласцох розвою системи спорта, спортскей инфраструктури и младежскей политики.

У соощеню стої же секретар Баста виявел же за проєкти и програми у тих обласцох у покраїнским буджету обезпечене 555 милиони динари. То блїзко 140 милиони динари вецей як прешлого року, цо потвердзує опредзелєносц же би ше укладаня до розвою спорта и спортскей инфраструктури дзвигло на ище висши уровень.

Найвецей пенєжу – 350 милиони динари – аж 100 милиони вецей як прешлого року, видвоєне за укладанє до спортскей инфрастриктури, односно за вибудов, отримованє и за опрему спортских обєктох у АП Войводини.

За доприношенє розвою спорта предвидзени 90 милиони динари, скоро 13 милиони вецей як цо було 2024. року.

У тим року за организацию и участвованє на медзинародних манифестацийох од значносци за АП Войводину планирани 45 милиони динари, за афирмацию женох у спорту дзешец милиони динари, а за афирмованє школского и универзитетского спорта видвоєни осем милиони динари.

Кед слово о младежским секторе, за запровадзованє младежскей политики опредзељени 43 милиони динари, за змоцнєнє и снованє канцеларийох за младих пейц милиони, а за реализацию програми „Фонд за таланти“ штири милиони динари, стої у сообщеню Покраїнского секретарията за спорт и младих.

ПОВЯЗАНИ ТЕКСТИ