ШИД – У Руским доме вчера отримана промоция сликовнїци „Животинї у дїдовим и бабовим дворе“ авторки Наташи Еделински Миколка, за хтору илустрациї зробела Ивана Бучко, а видата є концом прешлого рока у едициї часопису за дзеци „Заградка“, НВУ „Руске слово“.
Сликовнїца представена школским дзецом хтори учa руски язик з елементами националней култури у школох у Шидзе, Бачинцох, Бикичу и Беркасове, а окрем авторки и наставнїци Наташи Еделински Миколка була присутна и одвичательна редакторка „Заградки“ Мая Зазуляк Гарди.
Школяром Мая Зазуляк Гарди поставяла питаня, школяре давали одвити, а потим авторка пречитала писню о одредзеней животинї. Окрем часопису „Заградка“ вона подзелєла и пригодни сликовнїци и поволала школярох же би посилали свойо роботи до „Заградки“.
Потим отримана и роботня на хторей ше рихтало вельконоцни єдла хтори ше кладзе до кошарки, а вец ноши до церкви пошвециц на Вельку ноц. О єдлох школяром бешедовали Ясминка Димитриєвич и Геленка Папуґа зоз Здруженя женох „Маря“.
