Руснацом ше нє пише добре

автор Ол. Папуґа
1.1k Опатрене

У Сербиї жию 6  690  887  жителє, а на попису пред 11 роками нас було  7 186  862. То 495 975, односно 6,9% гражданох менєй як пред 11 роками. Зменшанє числа жительох зазначене у шицких реґионох за коло 10 одсто, окрем у Беоґрадским реґиону дзе жию 1 685 563 жителє, або 26 123 вецей як пред 11 роками, цо у процентох 1,6 одсто вецей. У Войводини ше число жительох зменшало за 182 453 особи, та тераз Покраїна ма 1 749 356 жительох

Податок же кельо у общей популациї єст проценти припаднїкох националних меншинох почекаме, алє же нас и далєй єст 1,3 милиони, односно 13 одсто, можеме лєм шнїц. Медзитим, податок же у Войводини єст коло 200 000 людзох менєй, дава Руснацом причину за роздумованє, же чи нас будзе 10 000 док сцигню детальни резултати з податками о структури жительства.

На основи достатих резултатох попису ше правя анализи привредного и дружтвеного розвою жеми, виробюю ше инвестицийни и урбанистични плани, правя ше стратеґиї и акцийни плани. Яки буду нашо плани и стратеґиї будзе завишиц од того кельо нас будзе, алє нажаль, нє ми себе, алє держава нам зреже вельо того цо маме. А ми ше будземе мушиц з тим помириц и, кед ше нє таргнєме и нє змоцнїме тото цо маме, можеме очековац же ше на шлїдуюцим попису зведземе на єден валал з трома улїчками. Треба мац у оглядзе же кед ше барз зменша число Руснацох  у Войводини, а кед ґу тому додаме ище вельку асимилацию, сербизацию, будзе питанє же чи таке школство хторе и тераз ма вельки проблеми, ми, Руснаци у Войводини, годни зачувац, и як длуго. 

На попису лєм Беоґрад и Нови Сад маю вецей людзох, нє прето же ше ту народзели вельо дзеци, односно же наталитет вельки, алє прето же ше ту шицки селя.  У Новим Садзе жию 367 000 жителє, 25 375 вецей як на прешлим попису. Медзи двома пописами у Войводини вєдно нєстали вароши таки вельки як Зомбор, Кикинда, Шид и Вербас.

Тренд селїц ше до Нового Саду маю и Руснаци хтори жию у наших валалох и сиґурно тот варош будзе други по численосци наших людзох, хтори ту, алє ридко хто з нїх жиє и ма руску свидомосц ˗ з дзецми бешедую по сербски, до церкви нє ходза, нє даваю дзеци на ученє мацеринского язика, пойду лєм на Крачун и Вельку ноц до родичох на валалє дзе баби и дїдове муша з унуками бешедовац по сербски, бо ше нє розумя иншак. А праве на Руснацох у Новим Садзе треба найвецей раховац. Наша нова стратеґия будзе мушиц обрациц увагу и на Руснацох хтори ше так вияшнюю, а нє знаю по руски бешедовац. То нам будзе мушиц буц цильна ґрупа.

Представителька Републичного заводу за статистику Лїляна Дьордєвич гварела же Сербия ма коло пол милиона менєй людзох як 2011. року, алє же ше преценює же тото число и векше, односно же нас єст 760 000 менєй. Нови Сад и Беоґрад маю неґативни природни прирост, алє векше число жительох у тих варошох зазначени пре досельованє. Дьордєвичова гварела же до попису ураховани коло 200 000 жительох за хторих утвердзене же су ту, а нє пописани су, бо их пописовач пре даяки причини нє нашол, або ше нє сцели пописац. Цо мож повесц контрадикторне. Просекови житель Сербиї ма 43,5 роки, а 2011. року мал 42,2 роки, цо значи же нам жителє стари. Вецей як 218 000 людзе пописани по административних жридлох, а то значи же нє жию у Сербиї, алє маю особни леґитимациї на адресох дзе их нєт, бо жию у иножемстве, пописани и стаємно и дочасово населєни странци, а и шицки особи хтори ше под час попису нашли на териториї Сербиї, тоти цо вимагаю азил, миґранти без утвердзеного статуса. Особи хтори робя у иножемстве, або аж и трецу ґенерацию ґастарбайтерох пописовачом приявели родичи, або сушеди.  Урядова статистика о умартих и народзених гутори же зме по тей основи страцели 470 000 людзох, цо би, кед би резултати попису були точни, виходзело же ше зоз Сербиї за 11 роки виселєли кус вецей як 20 000 людзе. Албанци зоз Прешевскей долїни дотераз бойкотовали пописи, а на тим попису ше пописали и єст их прейґ 100 000. Вимога ЕУ була же припаднїки тей националней меншини нє муша указац особни леґитимациї на попису, та приявйовали и дзеци цо су у иножемстве.

Южна и Восточна Сербия ма 196 906 менєй людзох, а у тих реґионох тераз єст 1 834 791 жительох. У Шумадиї и Заходней Сербиї єст 3 255 968 жительох, цо у одношеню на пред 11 роками менєй за 339 645 жительох. Попис нє запровадзени на Косове и Метохиї. Конєчни резултати попису буду публиковани сукцесивно од априла 2023. по юний 2014. року. Аж теди будземе знац и кельо єст Руснацох.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ