КОЦУР – Пригодна програма з нагоди означованя школскей слави святи Сава отримана вчера, 27. януара, у физкултурней сали Основней школи „Братство єдинство” у Коцуре.
Школяре за тот значни дзень пририхтали програму з котру возвелїчали живот святого Сави, а на початку му одшпивали гимну. З тей нагоди гуторели числени рецитациї и бешеди, а виведли и вецей шпиванки котри пририхтали зоз своїма учительками и наставнїцами.
Присутну публику з отриману програму здогадли на вредносци котри нам на чуванє охабел тот перши сербски архиепископ, просвититель и творитель законодавства. Тиж, през числени точки визначена була и улога святого Сави у розвою школства и образованя у Сербиї, понеже ше вон трима за зачатнїка сербскей стредньовиковней литератури и защитнїка просвитних установох.
Кажда точка вредних школярох котру виведли пред полну физкултурну салу була наградзена зоз гласним аплаузом численей публики.
