КОЦУР – З нагоди означованя Школскей слави святи Сава пондзелок, 27. януара, у школскей физкултурней сали школяре Основней школи „Братство єдинство” у Коцуре отримали пригодну програму.
Вредни школяре за тоту нагоду пририхтали числени точки з котрима возвелїчали живот святого Сави, а програму почали зоз гимну котру му одшпивали.
Шоровали ше числени рецитациї и бешеди школярох, а наймладши одшпивали и вецей шпиванки котри пририхтали зоз своїма учительками и наставнїцами.
Директорка Основней школи Сенка Мученски зоз пар словами тиж визначела значносц святого Сави за школство и образованє, а вкупну програму зоз танцами прикрашели и наймладши члени фолклорних секцийох КУД „Жатва” и КУД „Завичайне врело”.
И тогорочна програма за тото швето була нагода же би ше числена публика здогадла на вредносци котри нам на чуванє охабел тот перши сербски архиепископ, просвититель и творитель законодавства. Понеже ше святого Саву трима за зачатнїка сербскей стредньовиковней литератури и защитнїка просвитних установох, през числени точки визначена була и його улога у розвою школства и образованя у Сербиї .
Присутни зоз гласним аплаузом наградзели кажду точку вредних школярох котру пририхтали за тото швето.
