Солистични концерт Катарини Кочиш

автор В. Вуячич
508 Опатрене

НОВИ САД – У Музичней школи „Исидор Баїч”, у амфитеатру на 3. поверху, 25. мая Катарина Кочиш отримала солистични концерт.

Катарина Кочиш закончела соло шпиванє у класи Ивани Йованович и Вери Зечевич, на концерту ю на клавире провадзела Соня Мушикич. Як госц на концерту Ивана Охмут на клавире виведла вецей композициї.

Як то уж шор же ше школски рок у музичней школи закончує зоз концертом у форми явенй годзини, так и Катарина после шейсц роки, соло шпиванє закончела зоз успишним соло концертом. Виведла осем нумери, а на репертоаре були Бах, Моцарт, Пучини, Милоєвич, Бернштайн…

На концу Катарина подзековала професорком хтори ю учели шпивац, алє и фамелиї и приятельом хтори ю цали час потримовали. Кочишова и порядни студент на Академиї музичних уметносцох на трецим року студийох напрям музична педаґоґия.

Здогаднїме же Катарина Кочиш ище од дзецинства участвує на рижних програмох у Руским културним центру у Новим Садзе, на наших фестивалох Червене пупче, вец и на Червеней ружи, а поряднє наступа и на новосадскей Ружовей заградки.

ПОВЯЗАНИ ТЕКСТИ