ШИД – З нагоди означованя школскей слави Святи Сава, вчера у сали Скупштини општини Шид отримана пригодна шветочносц хтора почала зоз святосавску гимну „Ускликнимо с любавлю светителю Сави“.
Потим священїки Сербскей православней церкви отримали молитви и пошвецели славски колач вєдно зоз предсидательом општини Зораном Семеновичом и предсидательом СО Шид Дьордьом Томичом.
На шветочносци додзелєни и „Святосавски повелї“ хтори доделює општина Шид, а з тей нагоди достали припознанє 11 школяре и дзевец просвитни роботнїки, медзи хторима спред ОШ „Сава Шуманович“ у Ердевику Повеля додзелєна професорови русийского язика и литератури Зденкови Лазорови зоз Бикичу хтори и подзековал у мено наградзених.
Зоз пригоднима програмами швето означене и у Предшколскей установи „Єлица Станивукович Шиля“ и у основних и штреднїх школох на подручу општини.
СКУД „Святи Сава“ з нагоди швета отрима концерт на соботу 31. януара у Спортскей гали у Шидзе на 18 годзин.
