КОЦУР – У рамикох Дзецинского тижня у Велькей сали Дома култури у Коцуре вчера, 10. октобра, одбавена представа Руского народного театру „Петро Ризнич Дядя” под назву „Инсталуй и ти дїдов джи пи ти (GPT)”.
У полней сали Дома култури ґлумец Емил Няради зоз тоту интерактивну представу, витворену по текстох Ирини Гарди Ковачевич и Славка Ороса, зацикавел и нашмеял коцурских наймладших.
Присутни були школяре Основней школи „Братство єдинство” зоз своїма учительками, учительом и наставнїцами, як и дзеци зоз Предшколскей установи „Бошко Буха” – оддзелєня „Герлїчка” зоз Коцура.
Авторе ше зоз тоту представу намагаю зачувац од забуца и пояшнїц велї руски присловки, фрази, стилски фиґури хтори младши, окреме дзеци, вше менєй хасную, а котри представяю праве богатство руского язика.
Активне участвованє коцурских дзецох у представи и одвитованє на питаня котри им ґлумец Няради поставял, як и ошмихи на їх тварох и гласни аплауз на концу, знак же представа була успишна.
Идейни автор проєкту Славко Орос, режию подписує Владимир Надь Ачим, а з тей нагоди ансамбл Руского народного театру мал помоц и младей композиторки и шпивачки Кристини Афич, хтора за тоту представу компоновала уводну шпиванку, а виведала ю дзецинска шпивацка ґрупа
