У керестурскей школи представена сликовнїца „Наша свадзба” (фото+видео)

380 Опатрене

РУСКИ КЕРЕСТУР – Сликовнїца „Наша свадзба” зоз роботну теку представени вчера 22. априла, у керестурскей Основней школи „Петро Кузмяк”, школяром 3. и 4. класи, Госцох, представительох НВУ „Руске слово”, на чолє з директором Борисом Варґом, привитала директорка Школи Наталия Будински.

Сликовнїца представена през роботнї та приказани обичай рускей свадзби, зоз презентацию облєчива и фотоґрафийох з вецей руских местох, зоз найдавнєйших часох и видео-знїмку правей свадзби у Коцуре, зоз 1983. року.

Промоцию водзела одвичательна редакторка часопису за дзеци „Заградка” Ясмина Дюранїн, зоз потримовку Андреї Штефанко з Дому култури Руски Керестур, задлуженей за облєчиво, и новинарки Олени Папуґа котра дала историйне огляднуце.

Так обичай рускей свадзби представени на интерактивни способ, бо школяром представени и велї предмети хтори ше на нєй хасную, (свадзебни ручнїки, розмариї, млодов венєц…). А дзепоєдни обичаї представели и школяре у улогох учашнїкох на свадзби, та роботня була жива и интересантна.

На концу дзеци достали и по прикладнїк новей кнїжки вєдно зоз роботну теку, хтори вишли як 11. и 12. кнїжка у едициї „Заградка”, за хтору материял пририхтала и тексти написала Мая Зазуляк Гарди, а илустрациї Аня Заґоричник.

Новинско-видавательна установа „Руске слово”, з потримовку Буджетского фонду за национални меншини Министерства за людски и меншински права и дружтвени диялоґ, обявела сликовнїцу зоз роботну теку наволану „Наша свадзба”, за дзеци од 4 по 12 роки.

Нєшка, 23. априла промоция сликовнїци „Наша свадзба” зоз роботну теку будзе у школи у Коцуре од 10:15 по 11 годзин и од 12:45 по 13:30 годзин. Предвидзени два роботнї за школярох од I по IV класу и од V по VIII класу.

ПОВЯЗАНИ ТЕКСТИ