НОВИ САД – З нагоди Националного швета до Националного совиту Руснацох у Руским Керестуре винчованки сциговали и прейґ телеграмох и електронскей пошти.
Министер за людски и меншински права и дружтвени диялоґ Томислав Жиґманов винчовал предсидательови Националного совиту рускей националней меншини Йоакимови Рацови и свшицким припаднїком рускей националней заєднїци 17. януар – Националне швето Руснцох у Сербиї. Медзи иншим у винчованки пише и же през историю длугу вецей як 270 роки на подручу Сербиї, Руснаци сновали и розвивали свойо образовни и други институциї од значносци за очуванє и розвой националного идентитету, та до нєшка зачували свойо мено, язик и богате културне нашлїдство. Цалу винчованку мож пречитац на тим линку.
Руснацом швето винчовал и Покраїнски секретар за образованє, предписаня, управу и национални меншини – национални заєднїци Роберт Отот. У винчованки пише же у Автономней покраїни Войводини вєдно з другима националнима заєднїцами, жию и припаднїки рускей националней заєднїци, пестуюци вредносци интеркултуралносци, соживота, медзисобного уважованя, довирия и порозуменя. У очуваню и унапредзеню тих вредносцох, руска национална меншина – национална заєднїца дала и надалєй дава окремне доприношенє, и так муши буц и у будучносци. И тоту винчованку мож пречитац на тим линку.
Спред Одбору за людски и маншински права и ровноправносц полох Народней скупштини националне швето Руснацох повинчовал и його предсидатель Александар Маркович. Вон у винчованки пожадал най припаднїки рускей националней меншини и надалєй успишно розвиваю и пестую свою традицию, културу, язик и шицко тото цо национални вредносци Руснацох.
Щири винчованки и найкрасши жаданя за Националне швето Руснацох, послал и Апостолски Нунций у Беоґрадзе Санто Ґанґеми.
