НОВИ САД – У едициї „Заградка”, у виданю НВУ „Руске слово”, обявена 16. кнїжка за дзеци „Числа” авторки Наташи Еделински Миколка.
„Числа” то кнїжка о швету числох. Авторка попреплєтала числа зоз словами и поскладала до складних писньочкох. На тот способ поєдноставени знаня о системи числох и їх хаснованю у бешеди. Авторка почина од нули, як дачого цо нє означує нїч, алє и додава вредносц каждому числу, потим шлїдза числа од єден до дзевец, а потим дзешатки по число сто. Каждому числу красу додава илустраторка Ивана Бучко.
Нову сликовнїцу мож купиц за 400 динари у представительствох НВУ „Руске слово” – у Новим Садзе на адреси Футожска 2, ІІІ поверх (од 9 по 14 годзин) телефон 021/6613-697. У Руским Керестуре у будинку дакедишнєй Друкарнї на II поверху и на телефон 025/51-00383 або 025/703-311 (од 9 по 14 годзин), як и прейґ колпортерох по наших местох.
Тиж так, шицки рускословски кнїжки мож наручиц и прейґ сайту https://knjizkiporuski.com.
