НОВИ САД – Тих дньох вишло майске число часопису за дзеци „Заградка”, а зоз ню и дарунок – Бависко мемориї.
Рубрика Госци и новосци и у тим чишлє обвисцує Заградкарох о тим цо ше случовало прешлого и того мешаца, а рубрика Сцеме знац и упознац, медзи иншим, пише о новим видеу на нашим Ют’юб каналу Ruske slovo za dzeci и о тим як нам було на промоциї сликовнїци „Животинї – у дїдовим и бабовим дворе” у Шиду.
У Читальнї находзи ше проза и поезия за дзеци, док Мала заградка понука писньочки у сличкох, квизчок о дньох у тижню, як и рисунки оводарцох.
За майску „Заградку” сцигли 126 подобово и писмени роботи дзецох зоз шейсцох местох, а даєдни з тих роботох мож найсц на вецей бокох у тим чишлє.
Солмизация дава ноти и текст єдней дзецинскей шпиванки, док у рубрики Мудро и безпечно мож ришиц квиз.
У рубрики Радио у Заградки, водительки Емисиї за дзеци Леа и Анамария Ранкович писали о Дню планети Жеми, а рубрика Питаня и толкованя о 270 рокох образованя на руским язику.
На Бависку мемориї треба виштригнуц шицки карточки, помишац их и поскладац так же би сличка була обрацена на долу, а потим глєдац два исти. Авторки илустрацийох на карточкох Александра Медєши, Танита Ходак и Александра Русковски.
