УЖГОРОД (УКРАЇНА) – У грекокатолїцкей катедрали Воздвижения чесного хреста у Ужгородзе у України, вовторок, 16. юлия вецей як 2.000 вирни, числени епископи и священїки зоз цалого швета присуствовали на архиєрейней Служби Божей на котрей, на дзень кед Мукачовска епархия слави швето Чудотворней Икони Мукачовскeй Пресвятей Богородици, рукоположени и интронизовани нови епископ Мукачовскей грекокатолїцкей епархиї преосвящени владика Теодор Мацапула. Папа Франциск, 8. мая 2024. року дал дошлєбодзенє за його хиротонию зоз назначеньом же будзе нашлїднїк Ужгородскей униї, русинскей традициї.
На рукоположеню у Ужгородзе були числени владикове – а медзи нїма и преосвящени владика и епарх Георгий Джуджар зоз парохом коцурским о. Владиславом Рацом.
Архиєрейна служба Божа, на хторей владика Теодор приял епископску хиротонию була служена по церковнославянски, бо тот язик єден зоз главних прикметох нашлїднїкох Ужгородскей униї у церковних обрядох. Преосвящени владика Теодор Мацапула ше народзел 21. авґуста 1981. року у Крилосу, у старим Галичу, у Ивано-франковскей обласци у України. Школовал ше у України и Италиї, а 25. авґуста 2007. року дал вични завити, а 10. фебруара 2008. року є пошвецени за священїка. Од 2008. та по 2013. рок пастирску службу окончовал звонка України, а кед ше врацел бул священїк и робел административни роботи у Мукачовскей грекокатолїцкей епархиї. Року 2018. дипломовал на Карпатским националним универзитету, а 2022. року достал лиценцу зоз пастрискей теолоґиї на Українским католїцким универзитету. Папа Франциск го 8. мая 2024. року меновал за главного епископа Мукачовскей грекокатолїцкей епархиї.
