На початку 2026. року шветово науковци зробели експеримент котри би могол одкриц евентуално глїбшу, квантну природу ґравитациї, и так конєчно повязац два физики зоз котрима жиєме, а котри спроцивени – Айнштайнову общу теорию ґравитациї и квантну физику. Тиж так, виглєдоваче, пошвецени же би одкрили на яки способ вилїчиц рак панкреасу, а друга екипа науковцох одкрила нєставанє атлантских лєсох у Бразилу, причина тому то же ше суньоґи кармя зоз людску, а нє животиньску креву (цо вецка оможлївює преношенє оберацих хоротох)…
Источашнє, киднаповани венецуелански предсидатель Николас Мадуро, Трамп грожи же превежнє данску автономну територию Ґренланд, грожи Ирану, опомина Україну… Од домашнїх вистох котри тутейшу власц подзвигли на ноги: на фолк шпивачку Ану Бекуту руцали шнїгово груди у Чачку, на щесце, компетентни пренашли виновнїкох у барз кратким чаше. Чекаме уредбу зоз котру будзе забранєни шнїг и шнїгово груди, же би тота пошесц вецей нє знємирйовала тоту власц у штред ноци. Тиж так, чекаме уредбу зоз котру будземе мац обовязку плациц, вшелїяк, зоз нашим пенєжом, зоз буджету, шицких шунд уметнїкох котри забавяю наших шунд политичарох.
Кед бизме провадзели голєм онлайн часопис Science Daily, були бизме обчаровани (вшелїяк я гей) зоз тим цо шицко наша файта способна одкриц, виглєдац и розумиц… На другим боку руцанє шнїгових грудох до Ани Бекути збуванє, алє нє збуванє же дзепоєдни населєни места у Сербиї були днями без струї пре шнїг. Нє збуванє анї виглєдованє о карциному панкреаса.
И дурни, опасни Трамп, апотеза самого капитализму. Значи, цивилизация ше источашнє розпада и рошнє. Питанє полуполного, або полупразного погара, барз фрустрируюце кед думаме на тоту цивилизацию, кед розумиме же ше вона нєпреривно руша, и же то ище вше стихийно, без шора, же ше цивилизация розпадує док твори, и док ше знїщує. Кед похопиме же маме нєвироятни схопносци и моци, и же зме источашнє вообще нє овладали зоз власнима моцами и власнима схопносцами. Кед бизме овладали, нє споминала бим капитализем, нїґда. Лєм науково досцигнуца.
Питанє чи погар полуполни, чи полупразни, вимага преширйованє питаня, и, гей, воно питанє класного положеня припатрача. Од сподку погар преполни, з боку є полуполни, або полупразни, а кед патриме од горе та є празни, мож го ище вше дополнїц. Патрено од сподку, зоз пролетерскей перспективи, то преполнєти погар води котра нас дави, и треба го розбиц.
Становиска висловени у тим тексту виключно авторово и нє вше одражую ушорйовацку политику новинох „Руске слово”.