ДЮРДЬОВ – Од соботи 14. юлия по вчера, 20. юлий, у Дюрдьове на трох локацийох у вецей орґанизованих роботох помагала ґрупа волонтерох з Голандиї котра пребува у Коцуре, дзекуюци партнерству Канцелариї за помоц восточней Европи и коцурскей Євангелскей церкви.
Волонтере офарбели роштелї на дзверох и облакох, ґоли и ограду на стадиону ФК „Бачка”, ушорели Євангелску церкву у Ромским населєню, змоцньовали фундаменти будинка, поставели изолацию, оградзели двор, положели фасаду и обилєли обєкт, а на бавилїщу за дзеци у истим насалєню волонтере поставели лєтнїковец, изоловали будинок и офарбели мури. Тота їх нащива нє перша.
-У Дюрдьове зме наймладша вирска заєднїца, иснуєме осем роки. Волонтере ше вязали за тото место, обачели же ше чежко жиє, алє и же єст напредку. Вжиме зме ту орґазновали обуку за шице на машини, за правенє резанкох, обезпечиме им машини за шице и резанки, орґанизуєме им рижни курси и активносци за злєпшанє їх живота, гварел Александар Суботин, пастор Євангелскей церкви з Коцура.
Волонтерох було шицких возростох, а подзелєли пакети зоз поживу и средствами за гиґиєну.
-У мено Реформатскей церкви запровадзуєме каждого року проєкт же бизме помогли худобним. Окреме ме дотхло худбоство и дискриминация Ромох у Сербиї. Дзечнє им помагаме. Интересантне ми же, гоч маме вецей средства за живот, и шицко цо нам треба, нєщешлїви зме и то нам поука – гварела Хелена Синтерниклас.
Акциї у Дюрдьове и Коцуре финансовани дзекуюци додатним активносцом волонтерох котри у своїм месце зберали средства.
-Орґанизовали зме вечери и полудзенки з лутрию на котрей зме зберали добредзечни прилог, предавали бомбони и колачи, глєдали спонзорох, особнє зме зберали пластични фляши за рециклованє и предавали. У тим нам помогли и школи котри нам донировали фляши. Здалєка нам Ромске населєнє нє випатрало подло, алє кед зме вишли з авта були зме дакус злєкнути и чежко нам було видзиц як жию, гварел волонтер Лирой Дейонґ котри планує и нарок участвовац у акциї помоци худобним.
Волонтере котри позберани коло Реформатскей церкви сцигли зоз города Страєн коло Ротердама, котра пейдезшат роки орґанизує гуматирани акциї и посила волонтерох на помоц до восточних частох Европи, найчастейше до Сербиї, Горватскей, Польскей, України и Румуниї.
