ВЕРБАС – У просторийох Културно-просвитного дружтва „Карпати” у Вербаше всоботу вечар, 26. септембра, отримани XVI Фестивал хорского шпиваня.
Тота традицийна манифестация хорского шпиваня, хтора од окремней значносци за руску националну заєднїцу, отримана пред красним числом присутней публики. Нащивительох и почитовательох хорского шпиваня перше привитал предсидатель Културно-просвитного дружтва „Карпати” Василь Дацешен, а потим пар слова гуторел и предсидатель општини Вербас Милан Ґлушац.
На початку програми зоз шпивом вецей шпиванкох публику привитали домашнї, вербаски Хор КПД „Карпати”. Дириґент хору Саня Копривица, а през шпиванки их провадзел оркестер на чолє зоз Любомиром Сакачом Андрийом.
Потим шлїдзел наступ Женскей шпивацкей ґрупи Дома култури Руски Керестур, и даскельо композициї котри за трогласне шпиванє присподобела Ирина Олеяр. Руководительки ґрупи Еуфемия Планкош и Ирина Олеяр. Публики ше зоз шпиванку представело и Дружтво Руснацох зоз Суботици, чий руководитель Дияна Мишколци Киш.
Фестивалску програму зоз своїм шпивом возвелїчал и Церковни хор Грекокатолїцкей церкви Успения Пресвятей Богородици зоз Коцура, под дириґентску палїчку Александра Планкоша. Потим ше зоз вецей шпиванками представела и Старша шпивацка ґрупа КПД „Дюра Киш” зоз Шиду, под руководительством Снежани Лазич. Провадзел их оркестер Дружтва под руководительством Драґана Макивича.
Фестивал закончени з наступом Мишаней ґрупи РКЦ з Нового Саду, котра з тей нагоди виведли вецей шпиванки, чий уметнїцки руководитель Борут Павлич.
Програму Фестивалу хорского шпиваня водзела Дияна Мученски, а шицких учашнїкох присутна публика випровадзела зоз моцним аплаузом.
Манифестацию потримали Национални совит рускей националней меншини, Покраїнски секретарият за културу, явне информованє и одношеня з вирскима заєднїцами, Покраїнски секретарият за образованє, предписаня, управу и национални меншини-национални заєднїци, Завод за културу Войводянских Руснацох и Општина Вербас.
