МИКЛОШЕВЦИ (ГОРВАТСКА) – Того викенду успишно отримана 41. по шоре Културна манифестация Миклошевци 2026.
Пияток, 25. септембра, на 18.45 г отворена вистава ручних роботох Зоз бабовей лади у Доме култури. Автор вистави Владимир Мишлєнович, потолковал мотиви на ручних роботох, а того року тема були вишивани салвети. Тиж так указал окрему подзековносц ґаздиньом хтори дзечнє пожичели свойо роботи же би ше направела вистава.
Потим програма предлужена зоз Вечаром приятельства, шпиванки и танцу. У програми участвовали дзецинска и старша фолклорна ґрупа та женска шпивацка ґрупа домашнього КУД Яким Ґовля Миклошевци, а госци були петровске КУД Яким Гарди, хлопска шпивацка ґрупа и танєчна ґрупа, а зоз сушедного Сотину пришла шпивацка ґрупа КУД Матия Ґубец.
По законченей програми за учашнїкох и госцох орґанизована вечера зоз друженьом и живу музику.
Орґанизатор Културней манифестациї Миклошевци 2026 КУД Яким Ґовля Миклошевци, а под покровительством Совиту за национални меншини Републики Горватскей (РГ) и сопокровительством Општини Томповци и Союзу Русинох РГ.
