РУСКИ КЕРЕСТУР – У Велькей сали Месней заєднїци, всоботу 26. септембра, отримана промоция двох найновших виданьох Рускей матки.
У першей часци, после премиєрного представяня у Коцуре, и у Керестуре представена интеркултурална антолоґия поезиї „Дуга над валалом/Дуга над селом 2”, о хторей бешедовал предсидатель Рускей матки и главни редактор др. Михайло Фейса. Антолоґия обявена у рамикох проєкта „Интеркултурална творчосц Руснацох” Рускей матки, а з нагоди 30-рочнїци кнїжки „Дуга над валалом 1” хтора публикована 1995. року. У кнїжки заступени твори поетох и поетесох зоз вецей наших местох и на вецей язикох, а даєдни з нїх того вечара и пречитали свойо дїла зоз кнїжки та присутни могли чуц писнї на руским, сербским и словацким язику.
У другей часци вечара премиєрно представена нова кнїжка Михайла Катони под назву „На преходзе до терашньосци – написи, информациї, писма, бешеди”, о хторей перше бешедовал рецензент др. Михайло Фейса, а потим и сам автор. Фейса визначел же рукопис подзелєни до пейцох часцох: написи о привреди, информациї, автобиоґрафски написи, писма и отримани бешеди, а тексти зазначени починаюци од 1975. року та скоро по нєшка. Детальнєйше о змисту нового виданя бешедовал и сам автор Михайло Катона, хтори гварел же му намира була же би остало записане як ше розвивал валал и його привреда, понеже у своїм роботним вику участвовал у велїх проєктох, на рижних функцийох. Окрем привреди и валалу, автор описує и политични, та и дружтвени обставини єдного часу, нє лєм валалски алє и у цалей рускей заєднїци. Тиж так, у кнїжки мож пречитац и його автобиоґрафски написи як и бешеди зоз значних подїйох.
По законченю промоциї, шицки присутни достали по безплатни прикладнїк обидвох виданьох.
