БЕОҐРАД – Републична виберанкова комисия (РВК) обявела Роковнїк за окончованє виберанкових роботох у поступку нєпоштредних виберанкох за членох националних совитох националних меншинох котри буду отримани 8. новембра.
Виберанки и за Национални совит рускей националней меншини буду отримани на нєпоштредни способ, так же 8. новембра годни гласац шицки гражданє котри уж уписани або ше упишу до Окремного виберацкого списку (ОВС) рускей националней меншини найпознєйше по 23. октобер кед ше заключую ОВС.
Придаванє документациї за преглашенє виберанковей лїстини мож окончиц найпознєйше по 23. октобер, поцагнуц виберанкову лїстину годно по 27. октобер, а збирна виберанкова лїстина будзе обявена 28. октобра.
Найпознєйше по 23. октобер мож доставиц предклади за менованє членох и заменїкох виберацких одборох, котри буду оформени по 28. октобер.
Виберацки места буду одредзени и обявени найпознєйше 18. октобра.
Домашнї припатраче можу поднєсц вимогу по 31. октобер, а странски припатраче по 28. октобер.
Гласаче котри пре оправдани причини – хороту, старосц, або инвалидитет нє можу пойсц на гласацке место, можу ше приявиц за гласанє з дому, од 5. новембра по 8. новембер до 11 годзин.
Предвиберанкова цихосц будзе тирвац од пол ноци 6. новембра, по заверанє гласацких местох будзе 8. новембра на 20 годзин.