РУСКИ КЕРЕСТУР – У рамикох 35. Спортских бавискох „Яша Баков”, внєдзелю, 27. септембра, у Руским Керестуре на рибалову Еделински було отримане змаганє у лапаню риби.
На змаганю участвовали седем екипи, а у каждей були по троме змагателє, так же ше награди додзельовали за екипни, а тиж и за поєдинєчни успихи учашнїкох.
Екипи хтори участвовали на змаганю: КУД „Тарас Шевченко” Дюрдьов – (Микола Кухар, Яким Колошняї и Йоаким Корпаш), „Петровци 1” Република Горватска – (Мирослав Леколат, Владо Мазур и Мирослав Кисиль), „Петровци 2” Република Горватска – (Борис Ґрбич, Ґоран Колбас и Иван Василток), „Папивинґ” д.о.о Вербас – (Божидар Хрчан, Мирослав Ґубаш и Звонко Салаґ), ЗСР „Коляк 1” Руски Керестур – (Михайло Костелник, Дарко Чернок и Михайло Чернок), „РКЦ” Нови Сад – (Милан Брекайло, Саша Заьорянски и Мирослав Загорянски), ЗСР „Коляк 2” Руски Керестур – (Михайло Надь, Елемир Чапко и Йовґен Планчак).
У екипней конкуренциї, найуспишнєйша екипа на змаганю була ЗСР „Коляк 2” зоз Руского Керестура, хтора влапела 21,125 килоґрами риби, другопласована екипа була ЗСР „Коляк 1” зоз Руского Керестура, хтора влапела 18,785 килоґрами риби, док треце место завжала екипа КУД „Тарас Шевченко” зоз Дюрдьова, хтора влапела 9,425 килоґрами риби.
У поєдинєчней конкуренциї, найуспишнєйши бул Михайло Надь зоз Руского Керестура, хтори влапел пейц прикладнїки, а риба була чежка 17,250 килоґрами. Други бул Дарко Чернок зоз Руского Керестура, зоз двома влапенима прикладнїками хтори були чежки 8,960 килоґрами, док треце место завжал Михайло Костелник, тиж зоз Руского Керестура, зоз влапеним єдним прикладнїком хтори бул чежки 5,600 килоґрами.
Двоме Михайлове достали и окремни припознаня, Михайло Надь достал припознанє за найвецей влапени прикладнїки, док Михайло Костелник достал припознанє за найчежшу влапену рибу.
