Пред єденац роками першираз до Америки пошол Борис, о даскельо роки и його шестра Ана, а за нїма и наймладши брат Иван. Жили и робели у розличних городох, а шицки пошли дзекуюци програми за студентску черанку. Борис у Америки здобул диплому стоматолоґа, по його шлїдох рушела и Ана, а Иван би ше сцел витвориц у швеце ґастрономиї. Од септембра буду жиц вєдно у Маямию, буду робиц и крачац ґу тому цо себе давно зарисовали.
До Америки шицки тройо Буїлово почали одходзиц при концу студийох, даскельо роки за шором, окреме влєце. И Борис, и Ана, и Иван сцели дакус видзиц швета, почувствовац як ше индзей жиє, алє и заробиц. Часто були вистати од роботи и хибели им товарише, Нови Сад и Дюрдьов дзе препровадзовали дзецинство.
Борис до Америки першираз пошол 2006. року, а кед дипломовал на стоматолоґиї 2010. року у Новим Садзе, надумал жиц и робиц як стоматолоґ у Америки. Жаданє ше му витворело, бо достал америцку диплому стоматолоґа, закончел Интернационалну програму за стоматолоґох на Универзитету у Флориди, и достал диплому DDS (Doctor of dental surgery). Припознал нам же ше му нє було лєгко уписац, бо на спомнуту програму каждого року примаю лєм дванацецерих студентох, шейсц жени и шейсцох хлопох, а коло штиристо стоматолоґове з велїх жемох швета на тоту програму конкурую.
Шестра Ана и брат Иван за Бориса гваря же є знаходлїви и барз вредни, о шицким ше сам презнавал и розпитовал, так повесц, сам „пребивал ляд” у нєпознатей держави. У нєй перше мушел зрозумиц як функционує велька державна система котра вшадзи иншака, та анї у каждей держави у Америки. Стретал Борис и познал людзох зоз Сербиї, векшина там були дочасово, робели и врацели ше дому.
ПОТРИМОВКА БАРЗ ВАЖНА
Борис нєшка у Мексику на заслуженим одпочивку. Тих дньох ма присц и до Нового Саду, та и до Дюрдьова, а док ше враци до Америки, одлучи дзе почнє робиц.
– Американци почитую знанє и праксу, вредних и одвичательних, и каждому даваю нагоду же би указал цо зна. Тото ше ми попачело, бо сом жадал робиц у своїм фаху – гварел Борис Буїла, хтори искуство здобул як дентални гиґиєничар. З єдней часци му була припозната сербска диплома стоматолоґа, алє за шицко цо могол робиц у фаху мушел ше дошколовйовац. Року 2013. року почал робиц у зубарскей ординациї на Флориди. Робел розлични роботи, бо, як гварел, кед чловек роби може дацо и научиц. Анї раз нє подумал одустац од своєй идеї, анї теди кед му було найчежше. Операл ше на найблїзших. Тримало го и тото же ґу ньому пожадала присц його шестра Ана.
ВЄДНО СУ МОЦНЄЙШИ
Ана на вецей заводи нащивйовала Америку. Нїґда нє подумала остац там жиц, бо ю там нє так цагало. Медзитим, гвари же аж кед ше врацела отамаль, похопела як напредовала. Пачело ше єй же америцика система дава можлївосц витвориц ше у своїм фаху, алє и тото же ше и труд и знанє вреднує, а од заробеного крашнє жиє. О єден час ознова почала роздумовац о одходу до Америки, достала визу, алє пред тим, 2012. року дипломовала на Медицинским факултету у Новим Садзе на напряме – стоматолоґия. Кед пошла до Америки, по совиту брата Бориса, перше закончела школу за денталну гиґиєничарку, нашла роботу у тим фаху и почала ше пририхтовац за интернационалну програму котру и Борис закончел. Мала вельку потримовку брата Бориса котри ю нєпреривно совитовал и преношел власни искуства.
– Кед дацо посцигнєм, знам же то прето же сом дала шицко од себе, а нє прето же сом мала вязу, то ми ше барз пачи. Тераз робим у ресторану на єдним острове, а пред и после роботи вше учим и то ми фокус. Правда, нє лєгко, алє знам за цо ше борим. Дакеди сом жила з товаришами, а тераз жиєм сама же бим квалитетнєйше и лєпше орґанизовала свой час – приповеда Ана. Приятельох ма и там, алє єй хибя гевти з котрима росла. Емоциї, гвари, розлични, гоч носталґия присутна, Ана задовольна з тамтейшим животом.
– Трима ме тото же ше можем витвориц у тим цо любим. Кед бим мушела остац робиц лєм у ресторанох и кафичох, як на початку, вец бим свою будучносц нє видзела у Америки – гварела наша собешеднїца, а так дума и єй брат Борис. Од самого початку найвекшу потримовку маю од родичох котри их поряднє нащивюю.
ҐАСТРОНОМ ШЕ ПРИДРУЖЕЛ ҐУ СТОМАТОЛОҐОМ
Пред двома роками до Америки ше вибрал и наймладши медзи нїма – брат Иван, котри тиж одлучел там остац. Абсолвент є на Природно-математичним факултету у Новим Садзе, на напряме ґастрономия.
– Док нє дипломуєм, будзем робиц у ресторанох и здобувац праксу, а останєм у фаху, бо ме то виполнює. У Америки добри кухар гевтот котри зна порихтац вецей єдла зоз розличних континентох и розличних националних подручох, прето ми пракса барз важна. Там мож швидко найсц роботу, а затримац ю лєм кед ши вредни и одвичательни – гварел Иван Буїла. Вон уж робел у велїх ресторанох и у вецей местох по Америки, як и у Новим Садзе у Сербиї. Нєшка роби у єдним ресторану у Маямию. Роботу вше глєдал на оглашкох, и розпитовал ше при познатих. За розлику од брата и шестри, вон нє мушел нїч покладац же би могол достац роботу. Кед су шицки тройо вєдно, вон вше задлужени порихтац єдзенє у хторим шицки уживаю.
ЗУБАРСКА ОРДИНАЦИЯ И РЕСТОРАН – БУЇЛА
Буїлово у Америки наисце завжати, бо опрез себе поставели велї задатки. Борис и Ана би сцели мац власну стоматолоґийну ординацию, а Иван би любел напредовац як кухар, та можебуц єдного дня мац и свой ресторан за котри уж ма идею. Шицки тройо ше зложели же Америка створена жем за тих котри научени робиц. Живот швидки, як даяка машина, а тот хто сце вецей заробиц, муши и вецей робиц.
У Маямию єст вельо Сербох, так же ше орґанизую журки, велї шпиваче зоз нашей жеми там наступаю. Вони тройо виходза и там, алє пре обовязки, воля спортски друженя. Часто вєдно бавя кошарку, або свой шлєбодни час препровадза на базену.
МАЦЕРОВА ЮШКА И БАБОВА МАЧАНКА
Окрем найблїших, гваря же им найбаржей хиби мацерова домашня юшка и мачанка баби Ани Буїловей з Дюрдьова. Же би и єдним и другим було лєгчейше, Буїлово родичи их нащивюю голєм раз до рока, а оставаю там и по мешац. Вец вєдно обиходза интересантни места, мац вари тото цо вони найволя, и кажди дзень пече домашнього хлєба. Теди су шицки вєдно за столом.
