ДЮРДЬОВ – Всoботу, 28. априла, у Основней школи „Йован Йованович Змай” у Дюрдьове отримане 9. Медзиокружне змаганє з руского язика и язичней култури за школярох од пиятей по осму класу.
На змаганю участвовали 49-еро школяре зоз дзешец наших местох. Зоз порядней настави змагали ше 33-ойо школяре зоз трох основних школох – зоз Руского Керестура, Коцура и Дюрдьова. Зоз єденац школох дзе ше руски язик учи як виборни предмет участвовали 16-церо школяре зоз седем наших местох – зоз Нового Саду, Вербасу, Кули, Ґосподїнцох ,Сримскей Митровици, Савиного Села и Бачкей Тополї. Школяре хтори на тестох мали найвецей боди и завжали даєдно зоз перших трох местох достали дзецинску кнїжку, а наставнїцом руского язика и тром руским школом придати прикладнїки двотомного Словнїка руского народного язика, чий редактор др Юлиян Рамач и сликовнїци за дзеци.
Змагательох и госцох привитала и Вукица Петрович, директорка дюрдьовскей ОШ, Лазар Чонкич, член Општинскей ради задлужени за образованє, Мелания Римар, предсидателька Одбору за образованє Националного совиту Руснацох.
Свойо привитни слова виповедла и Мария Самарджич, наставнїца руского язика у дюрдьовскей школи, котра пред обявйованьом резултатох гварела же школяре добре поробели тести и указали високи уровень знаня, док єдна з орґанизаторох змаганя Ирина Папуґа, секретар Дружтва за руски язик, литературу и културу гварела же ше на тото змаганє одвовалало красне число школярох.
На Републичне змаганє ше пласовали 13-ецеро школяре, осмеро зоз порядней и пецеро зоз виборней настави котре будзе отримане 26. мая у Дюрдьове.
