ЗОМБОР − Штварток, 26. априла, отримане Окружне школске атлетске першенсто на котрим участвовали и 22 атлетичаре з Атлетского клубу „Русин” зоз Руского Керестура, котри источашнє и школяре Основней школи „Петро Кузмяк”. Першенство було з двох часцох – предполадньом ше змагали школяре од 1. по 4. класу, и 5. и 6. класа основней школи, а друга часц була предвидзена за змаганє 7. и 8. класох и штредньошколцох.
Од младших ше визначел Дамир Надь, школяр штвартей класи, котри у скаканю до далєка завжал треце место з резултатом 3,71 метер, а у истей дисциплини участвовали и Ивона Рац, Марґарета Чизмар и Аня Ґовля, шицки три школярки трецей класи. Попри нїх Филип Ноґо и Емина Няради бежали на 60 метери, обидвойо з трецей класи. Вортекс руцали Матеа Югик, школярка трецей и Анита Чизмар зоз штвартей класи. За тих атлетичарох то було перше змаганє на таким уровню, та шицки були похвалєни.
У младшим возросту, за школярох 5. и 6. класи, Филип Будински школяр шестей класи, завжал перше место у дисциплини руцаня кулї, котри дзекуюци резултату од 11 метери обезпечел пласман на Спортску олимпияду Войводини 17. мая у Новим Садзе. У тим возросту Теодор Няради, тиж зоз шестей класи, завжал друге место у бежаню на 60 метери, а змагал ше и Антоний Виславски у дисциплини скаканє до далєка, зоз пиятей класи.
У другей часци змаганя, за школярох седмей и осмей класи, Русиновци наступели як тим − Неманя Стойков бежал на 100 метери, Лука Иличич бежал на 300, а Александар Зорич на 800 метери. До далєка скакали Дарко Надь и Никола Накич, Тони Пашо руцал кулю, а штафету бежали Пашо, Стойков, Надь и Иличич. Екипно ше им удало освоїц пияте место, а медзи нїма ше визначел Дарко Надь котри скочел 5,03 метери и завжал треце место. Поєдинєчно ше змагали Валентина Еделински у руцаню кулї, а Иван Рац и Давид Надь у скаканю до далєка.
Штредньошколка Антония Монар завжала друге место у скаканю до висока. Пласман Монаровей, од 1,5 метери, знак же ше враца до форми, алє єй на тот завод конкурентка була шампионка держави. Тереза Будински зоз скоком до далєка себе обезпечела треце место, и попри покалїченого скочного ставца.
Атлетичарох за тоти змаганя пририхтали наставнїца физичного воспитаня у Основней и штреднєй школи „Петро Кузмяк” и тренер у Атлетским клубу „Русин” Саня Тиркайла, як и тренер за младши катеґориї Клубу Деян Будински.
