Медведз до медведза

автор снс/рhotofunia
5.1k Опатрене

Же ми, Руснаци, позната фодбалска нация, шведоча ище давни записи, добре, нє шведоча, бо их анї нєт, алє гайд.

Руски народ вше вязали за кнїжку и роботу, а нє за рондї. Гей же чежко назберац 11 фодбалерох, алє зоз кущичко асимилациї таке дацо мож поробиц. Га, майку му, нє можеме ми вше буц жертви асимилациї. Верице, нє верице, велї бавяче хторим ше герб найдзе на першох буду нєсподзивани же су Руснаци.

Селектор

Же би наша репрезентация бавела елеґантно, наша мала заєднїца би анґажовала бразилского тренера, а знаме же Национални совит Руснацох вше мал пенєжи за таке, за анґажованє фаховцох у шицких обласцох. Под дириґентску палїцу нашей репрезентациї би бул поставени Роландо – Травос де Коруптиво Чистос Каос Соуза де Пиня. Скрацено од Рола.  Познати бавяч мал интернационалну кариєру, и, як наглашел, за свойого скаута би вжал Дюру Виная, хтори длуго гребал по прешлосци наших нових, будуцих бавячох.

На капуру би даякого чловека хтори нє люби капуркову. Селектор руцел око на забуту леґенду – Давид Семан (David Seaman, Анґлия) то тот ґолман хторому Роналдиньо ,,шукнул” з половки ґол, лобовал го на Шветовим прешенстве. Велї ше нє буду складац з селектором, алє ми и так лєпшого ґолмана нє маме, понеже наш селектор побегал по наших валалох и нє видзел анї єдного трезбого ґолмана нєдзелю на змаганьох.

У охрани бизме мушели асимиловац даскелїх бавячох, т. є. прешвечиц их же су Руснаци.

Гавриїл Тамаш (Gabriel Tamas, Румуния) може бавиц на позициї ,,месара”, фахово поведзене – централного бека. Чловек за 28 роки кариєри пременєл дупло тельо клуби, мож повесц же меня клуби як Мая Ґойкович странки.

За позицию лївого бека нам помог наш скаут, Дюра Винаї. Иларион Костелник Гомзов (Laurent Koscielny, Французка) наша опция, а як гваря нашо бавяче хто зна – зна. Хто нє зна – бека.

Врацаме ше на позицию другого ,,месара”. Тоту позицию забера Радосав Ковач (Radoslav Kováč, Ческа Републикa) велька интернационална кариєра, бавел и за ,,Млаткарох”, а аж и у москвским Спартаку , цо значи же є Руснак – русийскей ориєнтациї.

И приходзиме по позицию правого бека. Нєт лєпша опция, знам же Керестурцом нє будзе лєгко, алє муши буц Коцурец. Дарко Фейса (Сербия), досц повесц же є Коцурец, нє треба вецей трошиц слова.

На позициї заднього–вязного нє треба бавяча хтори зна бавиц фодбал, алє тот цо зна бегац и ,,пейґлац”. Бавяч як Дженаро Ґатузо, а подобни як вон то, хто други, кед нє Любомир Фейса (Сербия). Чловек, такволани ,,Титула”, з нїм бизме могли думац и на трон Европи, а познєйше и швета.

З виходного по Америку

KAFA 1Як лєм знал, наш скаут виграбал ище єден бисер. Наш скаут у тей хвильки у церкви, а познєйше у тексту увидзице и чом, нормално, кед дойдзеце по конєц. Джуджар  (Balasz Dzsudzsak, Мадярска) хтори тераз пошол бавиц за Ал Вахда и хтори го добре плаци, а то и знак же є Руснак, понеже кадзи идзе Руснак кед нє за пенєжом. Його бизме удрилєудрилєли на позицию лївого кридла.

Алберт Руснак (Albert Rusnák, Словацка) жил у Кошицох, а родзени є у Ческей. Прави Виходняр. За ньго нїч нє мушиме повесц презвиско саме гутори. Вон будзе лєциц по правим кридлє.

Як видзиме наш селектор будзе бавиц у формациї 4-3-3 и нє будзе ше сцискац, як цо ше Руснаци сцискаю за пенєжи. Отворено, нападацки як би ше гварело, шмело. Чежко було вибрац нападачох, алє зоз длугочасову розгвару зоз скаутом, пришли до ришеня.

Дюра Гарди (Jamie Vardy, Анґлия). Гей же його мено и презвиско нє здабу барз на нашо алє, гей. Понеже пре гришки паноцох, вон нє добре уписани до кнїжкох, понеже у Анґлиї нє знаю правилно написац Дюра, а нашо Г у презвиску, сцели перше написац Х, та вец паноцове нашли компромис, та випадло В. Його позиция будзе у нападу з правого боку коло линиї. Дюро’с он файр, лєбо Дюри’с он файр.

Ниа, прецо наш скаут у церкви, глєда коренї Рунийови, и мено Джуджарови. Шпорта по церковних кнїжкох и наздаваме ше же му ше поспиши, бо нам таки бавяче буду барз хибиц. Вейн Руни (Wayne Rooney, Анґлия) Мали нїзки, швидки, скорей як почал озбильно бегац за лабду, тримал боксерски рукавици на рукох. Таки нам єден хибел же би нокаутирал процивнїка.

Кед ше лєпше зачириме до нашей прешлосци, похопиме же нашо предки пришли и зоз Єгипту, та єдна з династийох остала там, а то Салах, нєшкайше Салак. Зоз тим приходзи ище єдно одкрице, а то же ми, Руснаци, нє лєм християнє, алє и муслиманє. Сам приклад фодбалер Мухамед Салак (Muhamed Salah, Єгипет). Швидки є як Руснаци кед треба плациц рахунок, зна дац ґол, прави кридлови нападач.

Резерви

Роки Шанта-Круз (Roque Santa Cruz, Параґвай). Мено як видзице достал по филмским спектаклу, а назвиско Круз лєм прето же пред тим робел на Крузеру як келнер. Кед ше ришел алкоголу, т. є. охабел тоту роботу, обул копачки и, ниа, нашол ше на списку селектора, хтори му ище вше по списку лає пре погаричок, два. Центароф.

Роберт Макаї (Roy Makaay, Голандия). Пре роки транспортовани до резерви. Дальша родзина пекара Макая з Руского Керестура. Досц длуго є у пензиї, алє же го зна ,,увалїц”, зна. На списку ше нашол пре искуствиє.

Йошка Регак (Јоzef Rehak, Ческа Република). Млади ґолман, ище ше за ньго анї нє чуло, велька вироятносц же ше анї нє будзе чуц, алє як гваря – за нє дай Боже, треба нам двох ґолманох.

Кара Абодї (Kara Mbodji, Сенеґал) – Африканєц. Пошол били з Сриму, алє пре моцне слунко почарнєл. Може вельо бегац, бо ше як мали оганял з ґепардами. А саме мено гвари же будзе карац процивнїкох.

Андрий Шевченко (Андрий Шевченко, Україна). Гей же є селектор України, алє цо же тераз и при Руснацох може єден чловек буц на двох фунцкийох… Кед єден чловек може буц предсидатель-премиєер, може и тот буц селектор-бавячзацудзурепку!

Наш селектор  бега по континентох и глєда ище даскелїх бавячох же би змоцнєли резерву, док наш скаут уж мешац кампує у порти опрез церкви. Кед же ше скаутови нє поспиши пренайсц коренї тим двом, можебуц руци око праве на вас и положи вас на список, прето ше намагайце цо вецей, бо нїґда нє знаце чи праве ви облєчеце медведзов дрес.

Перше змаганє будзе одбавене у дальшей будучносци, а судия будзе Виктор Кашаї (Viktor Kassai, Мадярска)., Кашаї? Руснак?

Га, нє положели би ми нашого чловека най нам дзелї правду! Нє таки ми!

KAFA 2

ПОВЯЗАНИ ТЕКСТИ