НОВИ САД – У рамикох проєкта „Aвторки у рускей литератури” Новинарска асоцияция Руснацох (НАР) на своїм сайту https://nar.org.rs/ представела млади авторки, хтори пишу на руским язику.
Проєкт „Aвторки у рускей литератури” НАР реализовал з потримовку Покраїнского секретарияту за образованє, предписаня, управу и национални меншини–национални заєднїци, прейґ Конкурса за дотациї орґанизацийом етнїчних заєднїцох за 2018. рок.
Циль проєкта векша видлївосц литературней творчосци младих женох на руским язику, та прето з тим проєктом облапени поетеси хтори пишу на руским язику, народзени после 1985. року и младши, афирмовани и тоти цо на початку своєй поетскей кариєри.
Тиж так, з тим проєктом НАР ше намага афирмовац, промововац и стимуловац литературну творчосц младих женох на културней сцени Войводини.
Материял за обявйованє обезпечела и систематизовала професорка руского язика и литератури Ася Папуґа, иншак поетеса и новинарка у Редакциї програми на руским язику Радио Нового Саду ЯМУ Радио-телевизиї Войводини.
Резултат проєкта електронска кнїжка на руским язику, поставена на интернет сайт НАР, у хторей обявени позберани биоґрафиї з библиоґрафскима податками и портретами поетесох и, цо найважнєйше, часц поетскей творчосци младих авторкох.