МУКАЧОВ (УКРАЇНА) – Концом прешлого рока, 10. децембра, у Мукачове, у Закарпатскей обласци України, шветочно пошвецени нови будинок соборней церкви Мукачовского грекокатолїцкого владичества, хтори пошвецени св. апостолом Кирлови и Методийови. Будованє церкви почало 1996. року, преноши лем.фм.
Нови соборни храм Мукачевского грекокатолїцкого владичества пошвецел и Службу Божу предводзел кардинал Леонардо Сандри з Ватикану, префект Конґреґациї за восточни церкви, титуларни архиепископ емонски и дипломата Святого пристолу. Сослужели владика Мукачовски кир Милан Шашик, архиепископ львовски и митрополит Иґор Возняк з Українскей грекокатолїцкей церкви, владика Кошицкого владичества у Словацкей кир Милан Хаутур, други владикове и вецей священїки, а присуствовали и числени вирни.
Як на тей шветочней подїї гварел кардинал Сандри, назва нового соборного храму ма и символичне значенє, бо св. Кирил и Методий були творителє єдинства медзи церквами и народами и творителє заєднїцкей духовней визиї Европи. У новей катедрали буду змесцени и мощи св. Кирила и папи римского Йоана Павла Другого, хтори з тей нагоди придати прейґ кардинала Сандрия.
Мукачовска грекокатолїцка епархия найстарша русинска епархия, настала 1771. року, по Ужгородскей униї. После 9 рокох од єй снованя, 1780. року шедзиско владичества до Ужгороду пренєсол владика Андрий Бачински, а як Катедрални храм там служи Хрестововоздвиженски собор.
През историю, з Мукачовского владичества як директни, лєбо индиректни нашлїднїки настали велї владичества и церковни структури грекокатолїкох у Словацкей, Мадярскей, Сербиї, Горватскей, Ческей и ЗАД.