РУСКИ КЕРЕСТУР – Одбор за културу Националного совиту (НС) Руснацох вчера, 22. марца, розписал Конкурс за софинансованє програмох и проєктох у обласци защити нєматериялного културного нашлїдства и уметнїцкей творчосци Руснацох, односно за софинансованє роботи музично-танєчних и драмских секцийох у КУД-ох и здруженьох и участвованє на наших манифестацийох и фестивалох, насампредз пре злєпшанє квалитету уметнїцкого виводзеня.
За софинансованє програмох и проєктох у обласци култури по Конкурсу опредзелєни вєдно милион 500 000 динари – по 300 000 за пейц обласци – „хорске шпиванє”, „фолклорну творчосц”, за „народни и тамбурово оркестри”, за „жридлове шпиванє” и за „театралну творчосц” (дзе опредзелєни по 150 000 дин. за представи за одроснутих и за представи за дзеци).
Обласц „хорске шпиванє” ше насампредз одноши на пририхтованє хорох и хорских секцийох за участвованє на Хорским фестивалє „Карпати” у Вербаше; обласц „фолклорна творчосц” за порядну роботу фолклорних секцийох и за участвованє на Фестивалє фолклору Руснацох „Коцурска жатва”; обласц „народни и тамбурово оркестри” за порядну роботу оркестрох и за участвованє на „Мелодийох Руского двору” у Шидзе; обласц „жридлове шпиванє” за порядну роботу жридлових шпивацких ґрупох и участвованє на Фестивалє „Най ше нє забудзе” у Дюрдьове и обласц „театрална творчосєц” за пририхтованє театралней представи за дзеци, односно за пририхтованє театралней представи за одроснутих и їх участвованє на Драмским мемориялє Петра Ризнича Дядї.
Конкурс тирва по 14. април 2017. року, прияви ше подноши виключно на формулару за тот конкурс, а Конкурс (и формулар) у цалосци обявени на веб-сайту Националного совиту Руснацох – www.rusini.rs
Хтори проєкти котри сцигню на Конкурс буду софинансовани и з яку суму, будзе одлучовац Одбор за културу НС.
Як дознава Рутенпрес, подобни конкурс, алє за орґанизованє наших манифестацийох и фестивалох, на ютре розпише и Завод за културу войводянских Руснацох.