Националному совиту Руснацох дацо вецей як дзевец милиони динари

автор зам
1.3k Опатрене

БЕОҐРАД/РУСКИ КЕРЕСТУР – За роботу Националного совиту (НС) Руснацох з републичного буджету у тим року опредзелєни 9 милиони 033 871 динари, цо за 194 071 динар менєй як прешлого року, дознава Рутенпрес од предсидателя НС Славка Раца. Средства зменшани шицким националним совитом, понеже на розполаганю маю 5 милиони динари менєй як прешлого року.

За финансованє роботи националних совитох у 2017. року у буджету Републики Сербиї вєдно опредзелєни 245 милиони динари, гварела вчера директорка Канцелариї за людски и меншински права Влади Сербиї Сузана Паунович.

Як гварела, коло 110 милиони динари опредзелєни за роботу националних совитох трох найчисленших националних меншинох у Сербиї – мадярского (59,5 милиони), бошняцкого (27,8 милиони) и ромского (22,1 милион), а за роботу других 18 НС-ох коло 135 милиони динари.

Ришеня о финансованє НС-ох националних меншинох з буджету Републики Сербиї чолнїком, лєбо представительом совитох придати вчера, 24. фебруара у Палати „Сербия” у Беоґрадзе, у орґанизациї Канцелариї за людски и меншински права Влади Сербиї.

Спред НС Руснацох Ришенє приял його предсидатель Славко Рац, котри потим на истим месце присуствовал и на представяню Нарису другого Звиту о запровадзованю Акцийного плану за витворйованє правох националних меншинох у рамикох Поглавя 23 у прегваркох о приступаню Сербиї ґу ЕУ, цо тиж орґанизовала Канцелария за людски и меншински права.

Як гварела Пауновичова, у витворйованю Акцийного плану у трецим и штвартим кварталє 2016. року найвекши крочай напредок витворени у обласци образованя, а пожнї ше у часцох дзе присутна медзисекторска робота.

У реализованю активносцох з Акцийного плану участвую вецей як 70 институциї и орґанизациї, а у 2017. року у центре уваги будзе законодавна активносц, бо ше обчекує прилапйованє Закона о шлєбодох и правох припаднїкох националних меншинох и Закона о националних совитох националних меншинох, гварела Сузана Паунович.

ПОВЯЗАНИ ТЕКСТИ