Наташа Надьова давного 2000. року зоз мацеру дохторку, оцом инжинєром и младшу шестру Марину пошла жиц до Канади. Теди анї нє подумала же єй то можебуц анї нє будзе прави дом, нє у смислу же ше у нїм так нє будзе чувствовац, алє прето жє ю животна драга и авантуристични дух одведу на длугоку драгу по цалим швеце.
Пред тим як пошли до Канади, Надьова фамелия ше цали рок за одход пририхтовала. Надьово теди учели язик, же би ше могли цо лєгчейше знайсц у новим штредку хтори ше указал як цикави и интересантни.
– У Канади зме уж мали познатих, пайташки и родзину котрим зме ше радовали. Зоз шестру зме цале лєто одпочивали пред тим як зме почали ходзиц до новей школи. Там школска система орґанизована иншак, вецей уваги пошвецене практичней и самостойней роботи, и там цалком нормалне же дзеци на 14 роки, кед же сцу, можу зарабяц свой пенєж – толкує Наташа.
Пре нєпреривне жаданє упознац дацо нове, Наташа под час свойого школованя ходзела до кампох котри им понукала школа – лєтнї, „day” и „over night”.
Любов ґу природи Надьову одведла и на Факултет природних наукох, та и нєшка роби у тим фаху.
– На факултету сом ше опредзелєла за Co-op програму, т. є. єден семестер студийох, а други рок бул роботни. Нє мала сом анї єден лєтнї одпочивок, так ше ми там барз пачело. Под час студираня сом робела у лабораториї на виглєдованю „Биодиверзитету файтох лїшайох”, а у медзичаше сом робела и у Фармацеутскей компаниї у Торонту, и Министерству здравя у Отави як виглєдовач.
ВОЛОНТЕРСКИ АКЦИЇ
З волонтираньом наша собешеднїца виполньовала и тото дакус шлєбодного часу цо єй оставало. То єй отверело нови можлївосци упознац нови предїли и нових людзох.
– Нїґда сом нє мала страх од нового, приявйовала сом ше на волонтерски прєкти двох орґанизацийох, „Global Youth Network” и „Habitat for Humanity”. Прейґ першей сом пошла як учашнїк, а пошвидко сом постала и лидер їх акцийох. На волонтерскей акциї, на першим року студийох, звонка Канади сом була у Кениї, потим сом робела на своєй позициї и статусу у рамикох орґанизациї, та сом посцигла вельо висшу позицию. На штвартим року студираня була сом и сама лидер – орґанизатор цалей акциї, та сом водзела ґрупу волонтерох до Камбоджи. Африка специфични континент, з єдного боку єст людзох котри маю барз вельо, а з другого боку тих цо нє маю нїч. Лєтованя у Африки барз популарни, алє за тима ексклузивнима готелами стретаме правдиву биду и глад – приповеда Наташа и толкує як ше робело на едукованю и помоци тамтейшому жительству.
– У контакту сом зоз спомнуту орґанизацию и нєшка, и чуєм же ше им у малим населєню дзе зме були – Кампонґ Спо, удало справиц школу и библиотеку за дзеци основного образованя. Велї дзеци нє предлужую школованє, прето же муша робиц же би фамелия могла прежиц – толкує Надьова.
Менши проєкти волонтираня нащивйовала и на америцким континенту прей орґанизациї „Habitat for Humanity”. Була у ґрупи хтора путовала до Ню Орлеансу после велького Ураґану „Катрина” а часто волонтирала у околїску Торонта и Ґвелфа, як и на Флориди.
ПУТУЄ ПО ЦАЛИМ ШВЕЦЕ
По законченим факултету Универизитету у Ґвелфу, дзе достала назву –Токсиколоґ животного штредку, знала же сце робиц у своїм фаху, алє знала и тото же є авантуристка, и же ю єдно место нє „завяже”.
– Ище под час студираня сом дознала за орґанизацию „Teaching English Overseas” котра розширена по цалим швеце, а тиж сом мала и познатих котри путовали и робели прейґ спомнутей орґанизациї и по вецей як дзешец роки. То орґанизация прейґ котрей ше роби у анґлийских школох по швеце. Кед сом мала диплому у рукох, и TESOL сертификат, твардо сом ришела же пойдзем робиц до Азиї. Приявела сом ше до школох у Япону, Китаю и Южней Кореї. Перши одвит бул з Китаю у городзе Вензоу, провинциї Зеянґ. Роботу сом достала на єден рок, и то була права авантура. Людзох було полно кадзи ґод сом ше обрацела, анґлийски сом чула лєм на роботи и у клубу у котрим зме ше зберали, и то якиш „иншаки” анґлийски язик. Теди сом путовала по Азиї кельо ґод ми час допущел, та сом була на Тайланду, у Индиї, Непалу, Синґапуру, Малезиї, Хонґ Конґу, а обишла сом и велї предїли у Китаю. Здогадуєм ше же у Индиї налпи шлєбодно шейтаю по улїчкох, а боме знаю и нападнуц чловека. Док сом пребувала у Азиї, два раз сом була нащивиц фамелию и людзох котрим зме помагали и з котрима зме сотрудзовали под час моєй волонтерскей акциї у Камбоджи.
По законченю анґажману у Китаю, Наташа ше врацела на кратши час до Канади на одпочивок, а вец ше приявела на „International Baccalaureate Program”, бо сцела достац диплому професора. На Универзитету у Квинсланду у Бризбейну у Австралиї закончела жадани дополнююци студиї, и достала назву професора. Под час пребуваня у Австралиї, туристично путовала и на Нови Зеланд, а волонтирала на проєктох за очуванє загрожених файтох животиньох.
НОВИ ПОЧАТОК У МИНХЕНУ
Єдну медзи вецей послатих приявох за роботу, Наташа послала и до Минхену. Поволали ю, а вона гвари же то „нє так далєкого” од Керестура и Кули, та часто ходзи нащивиц бабу и дїда.
– У Минхену сом стаємно занята у анґлийскей школи, уж скоро штири роки. Випровадзам штварту ґенерацию своїх школярох, школяром од 6 до 12 класи по нємецкей образовней системи викладам науку, од 6 до 9 класи хемию, биолоґию и физику, а у висших класох сом професор биолоґиї и еколоґиї. То тогорочни мой анґажман, алє каждого року ше вше дацо пременї – гвари вона.
У Минхену нє мож нє пойсц на ”Октобер фест”
(Наташа у штредку)
О городох у котрих жила, гвари, може приповедац до тижня, та и теди нє буду бешеди докончени, алє як гвари, Минхен ше єй пачи и одвитує єй по менталитету и култури жительства.
– Околїско дзе бивам здабе на менши варощик, и ма вельо желєнїдла. Блїзко ми и озеро у котрим ше мож купац, а там нєдалєко и лєшик за бежанє або воженє бициґли – приповеда Наташа хтора и тераз туристично путує, бо ришела обисц цалу Европу.
– Першого року у Минхену сом ше скоро мешац рихтала за „Октобер фест” купела сом и традицийни народни шмати, а ишли зме вєдно зоз шестру Марину котра допутовала з Канади. Путовала сом и на Сардинию з товаришами з котрима сом ше сприятелєла, а кед ми ознова пришла шестра, пошли зме до Ирскей. Путуєм кельо ґод можем, орґанизуєм ше и зоз здруженьом рекреативного бежаня и пендраня по горох. У юлию орґанизовано идземе на Монт Бланк до Французкей, та ше наздавам ше витримам по верх – закончує Наташа з велькима планами и амбициями.
МОЖЕБУЦ ОСТАНЄ У МИНХЕНУ
– Дзечнє придзем и до Керестура и Кули, а так исто ше радуєм и одходу до Канади. Приходза и мойо з Канади, видзиме ше през рочни одпочивки. Затераз сом цалком задовольна з Минхеном, но нє можем потвердзиц чи там и останєм. Прешлого року сом ше уписала на постдипломски студиї прейґ Универзитету Квинсланду. Роботу мам стаємну и сиґурну, медзитим, хто зна кадзи ме одведу мойо интересованя – закончує Наташа.