АПОСТОЛСКИ ЕҐЗАРХАТ/РУСКИ КЕРЕСТУР – У шицких парохийох нашого Апостолского еґзархату на ютре припада швето Сошествиє Св. Духа – Русадля, єдно з найвеких християнских шветох. На Треци дзень Русадльох – на Завитни дзень, будзе преславена 200-рочнїца перших указаньох у Марийовим святилїщу, Водици.
Русадля того року падаю источашнє по обидвох календарох, а швето ше вола и Пейдзешатнїца, бо ше з нїм преславює зиходзенє Св. духа на апостолох и народзенє Церкви як заєднїци, цо ше збуло 50 днї по Исусовим воскрешеню.
Русадля ше у нашей Церкви на тих просторох преславює три, место два днї, бо треци дзень Завитни дзень у Водици. Того року на тот дзень, 6. юния, шветочно будзе означени и єй ювилей – 200 роки од перших нєзвичайних указаньох у студзенки коло драги до дакедишнього Филїпова,1817. року.
Шветочна Архиєрейска Служба Божа будзе на 11 годзин, а з нашим владиком Георгийом Джуджаром будзе ю предводзиц апостолски нунций у Сербиї монс. Лучано Сурияни, беоґрадски архиепископ Станислав Хочевар и други владикове, вельке число священїкох, а обчекує ше и приход числених вирних зоз шицких наших парохийох.
З нагоди ювилею обявене и треце, дополнєте виданє кнїжки о Водици о. Владислава Варґу, як и окремна брошура о тим Марийовим святилїщу.