Мож повесц же коцурску рок сцену од початку, та по нєшка, нїґда нє напущела Байорова фамелия. Гоч було вельо паузи и претаргнуца, вше дахто з їх фамелиї оставал у рок музики. Єден зоз иницияторох же би рок музика ознова зажила у тим валалє, бул Дюла Байор котри жадал предлужиц традицию котру започали його бачикове Павле и Имре.
Павле Байор, котри грал у першим составу рок бенда у Коцуре, 80-тих рокох, братовому синови Дюлови на ґитари указал перши акорди и уведол го до швета рок музики. Дюла, иншак, єдини зоз ґенерациї Байорових котри ше пренашол у музики, и тот хтори после велїх рокох и сам жадал ожиц рок музику, котра го одмалючка прицаговала.
– Мойо бачикове, як и мой оцец грали, оцец грал на труби, алє так лєм, за свою душу, а бачикове були у першим рок бенду у Коцуре. Мойо братнякове и шестринїци музику нє доживюю на таки способ як я, и гоч су талантовани, нє жадаю наступац, а я тримам же традицию котру почали Байорово, треба у валалє зачувац. О себе можем повесц лєм тото же сом вше любел ґитару, од своїх 13 рокох сом вше цошка грал. Док сом бул хлапец нє могол сом себе купиц ґитару, аж познєйше сом до нєй дошол, гоч плани за снованє рок бенду у моїм дружтве настали ище 1983. року – здогадує ше Байор.
Даскельо хлапци зоз Коцура, а Дюлово товарише – Ромко Сабо, Звонко и Борис Хромишово, Бранислав Павлов и сам Дюла – порушали бенд под назву „06” и под тоту назву наступали на Ґитарияди у Руским Керестуре и у дзепоєдних местох коло Коцура.
– Екипа була полна ентузиязму, Звонко бул вокал, Ромко грал на ґитари, Борис грал на клавиятурох, Бранислав на бубнох и я на бас ґитари. За инструменти зме ше знаходзели, углавним зме попожичовали од тих цо уж мали инструменти. И я перше пожичел, а вец и купел тоту исту, пожичену ґитару. Розглас зме вжали на борґ од тедишнього Младежского дому, з єдним словом – вше зме нашли способ грац и вежбац – гвари Дюла.
ПЕРША УСПИШНА МАТУРА
Перши наступ рок бенд „06” Байор мал 1984. року у коцурским Младежским доме на своєй малей матури, односно законченю осмей класи, дзе грали шпиванки од Баяґи, Дади Топича, „Последнє иґре лептира”…
– На першим наступу зме грали и шпивали и достали моцни аплауз. Реакциї були одлични, и наших парнякох, и наших наставнїкох. Нам ше то барз пачело, алє кед прешло лєто, порозходзели зме ше. Почала школа, двоме пошли до Руского Керестура до школи, двоме до Вербасу и проби зме отримовали лєм през викенд, алє зме ше якошик як бенд отримали ище даскельо роки и наступали на Ґитариядох, и локалних манифестацийох. Дефинитивно зме ше розишли кед Звонко, наш фронтмен, пошол на факултет – здогадує ше Дюла.
Кед ше бенд розиходзел пре оправдани причини, Дюла ше у стреднєй школи приключел ґу бенду „Шармери” и з нїма грал по конєц стредньошколского образованя, односно покля члени бенду нє пошли до войска. По приходу зоз войска, нє зишли ше ознова до истого составу.
– Од музики сом нє одустал, аж анї теди кед ше и тот бенд розишол, алє сом почал грац у вербаскей ґрупи „Армитон”, у котрей зме грали и по руски, и по сербски, авторски шпиванки, котри мали висц як албум, алє нажаль, пре войново часи на початку 90-тих, тото ше нє зисцело – гвари Дюла. Знїмки остали у Студию „М” у Новим Садзе, и дзень-нєшка ше емитую у младежскей емисиї на Радио Новим Садзе. Медзитим, у часопису МАК тиж обявени материял ґрупи „Армитон”, а зняти и спот котри ше з часу на час емитує на РТВ Войводини.
– Нєодлуга потим як нам ше нє удало видац албум спомнутей ґрупи, реґрутовани зме, и по законченю войни, добри 10 роки, нажаль, нїкому од нас нє було до музики, до рокенролу… Думам же рок музика теди почала умерац, нє лєм у Коцуре, алє и вельо ширше у нашей жеми – роздумує Байор.
НЇЧ БЕЗ ПРИЯТЕЛЬОХ
Як заря рокенролу 2006. року у Коцуре ше оформел нови бенд, „Дюла и приятелє” у котрим затримана добра часц репертоару котри грал бенд „Камене квеце”. Окрем на свадзбох, тот состав грал и рок вачарох, на котрих Коцурци ознова могли уживац у рок музики.
– Думам же 2000. року було бешеди о тим же би ше ознова члени позберали до ґрупи „Армитон”, алє члени уж нє були за тото. Животна драга их однєсла далєко од музики, а мнє, поведзме, тримал ище якишик порив же би ше порушало даяки рок бенд у Коцуре. Нажаль, шицки мойо пробованя и инициятиви нє давали резултат. После того, и я уж мал фамелию, та сом пре пенєж почал грац и другу файту музики, углавним на свадзбох и вешельох – гвари Байор.
Нєшка рок сцена у Коцуре з часу на час „ожиє”, голєм першого викенду у юнию, на преслави снованя мото клуба „Пеґасус” у Коцуре. На тей преслави уж 11 роки наступаю рок бенди, а инициятор и главни орґанизатор праве Дюла.
– Мойо вельке жаданє було же би голєм раз до рока млади приходзели и чули праву, квалитетну рок музику, а видзи ше ми же после телїх рокох видно резултати. На тоти „свирки” приходза нє лєм млади, алє и вельо младши одо мнє, цо значи же рок сцена годна обстац у Коцуре – прешвечени Дюла и додава же праве резултати видно у тим же ше у остатнїх даскельо рокох у Коцуре зявели два рок бенди. Нажаль, єден ше розпаднул, алє други обстава.
Ера интернету, социялних мрежох и доступносц рижней файти музики, младим вше вецей понукала „забаву дома” и у власней режиї, та наступи рокенрол интерпретаторох провадза лєм найвирнєйши слухаче и патраче.
НОВИ РОК ҐЕНЕРАЦИЇ У КОЦУРЕ
У остатнїх 10 рокох зявели ше ище два рок бенди у котрих ше млади опробовали у рок музики. Состав младшей ґенерациї „Демиґод“ успишно наступал на спомнутих Мото стретнуцох у Коцуре, на „Водова фесту” у Руским Керестуре и по дискотекох у Войводини. Нє менєй успишни бул и бенд „Амброзия” котри наступал на коцурских мото стретнуцох, алє уж даскельо роки су нєактивни, понеже ше члени бенду розишли, а фронтмен бенду ше одселєл до иножемства.
– Наисце ми мило же ше порушали тоти два бенди у Коцуре, и я нє одуставам од нїх. Помагам им кельо можем, давам им и инструменти, и простор за вежбанє, мотивуєм их кельо можем, алє нажаль, члени маю роботи, чежко шицко уклопиц… Шицко розумим, алє наисце маю мою щиру потримовку же би обстали – гвари Дюла.
У рок музики нєт пенєжу, нєт заробку, лєм любови и Дюлова идея же би ше оформело рок бенд у Коцуре у котрим буду грац ентузиясти и любителє тей музики котри жию и робя у Коцуре. Вон би их, гвари, „цагал за рукав” кед то будзе требац… По шицким судзаци – будзе требац, Дюла порихтани на шицко, лєм же би рок музика у Коцуре обстала.
ЗА МУЗИКУ ВШЕ ЄСТ ЧАСУ
Дюла цалого живота у музики, попри роботи у Общим шпиталю у Вербаше, вон предсидатель Мото клуба „Паґасус” у Коцуре, а активно грає у комерциялним бенду на свадзбох, алє и у єдним рок бенду „Fishermen and crocodiles” (рибаре и крокодили). Основани є на його инициятиву, а у нїм музичаре з вецей местох у Войводини. Зоз тим бендом Дюла наступа на рижних Мото стретнуцох и мото журкох…
