НОВИ САД – З нагоди Шветового молитвового дня, вчера, 3. марца, у францисканским манастире Св. Ивана Капистрана у Новим Садзе, у екуменским духу модлєна шветочна молитва. На молитви участвовали члени рижних вирских заєднїцох, медзи нїма були и нашо грекокатолїки, а по руски бешедовали Мария Гудак и Блаженка Хома-Цветкович.
На Шветочней молитви присуствовали представителє Римокатолїцкей Церкви, Словацкей еванґелицкей АВ Церкви, Реформатскей, Методистичней и Грекокатолїцкей Церкви. Модлєло ше по сербски, горватски, мадярски, словацки и по руски.
Шлїдзаци вельорочну традицию Шветового молитвового дня, того року жени з Филипинох здогадую шицких же би ше модлєли за правду и справедлївосц у швеце, инспировани з питаньом з Библиї „Чи сом нєсправедлїва ґу це?”.