БЕОҐРАД – Отвераюци схадзку з нагоди представяня Шестого звита о запровадзованю Акцийного плану (АП) за витворйованє правох националних меншинох, котра отримана 12. марца, директорка Канцелариї за людски и меншински права Сузана Паунович визначела же ше тот звит одноши на штварти квартал 2017. року, а же ше запровадзованє активносцох зоз АП за меншини поряднє провадзи.
Паунович визначела же од 76 ношительох активносцох, єденацецеро нє доручели свойо прилоги за тот циклус подношеня звитох, од чого 8 национални совити националних меншинох. Як Рутенпрес дознава, Национални совит рускей националней меншини свойо обовязки, цо ше дотика даваня звита о запровадзованю АП, на час сполнєл.
По словох Пауновичовей, 66 одсто активносцох за тот период реализоване, лєбо є у фази реализациї.
После отриманих обукох у предходним периодзе хтори запровадзовани з цильом подзвигованя квалитету подношеня звитох, директорка Канцелариї визначела же прилоги за Шести звит о запровадзованю АП за меншини доручели 40 єдинки локалней самоуправи и 20 совити за медзинационални одношеня.
Тераз ше зазберує прилоги за Седми циклус подношеня звитох и у наиходзацим периодзе Канцелария ше концентрує на дальше унапредзованє системи провадзеня АП, наглашела Паунович, визначуюци же ше предлужи потримовац шицки особи хтори участвую у процесу подношеня звитох, пре злєпшанє їх роботи и медзисобного сотруднїцтва.
На схадзки присуствовали представнїки державних орґанох и институцийох, медзинародних орґанизацийох и националних совитох националних меншинох.
