РУСКИ КЕРЕСТУР – Школяре оддзелєня II3, напряму туристични технїчар, у Основней и штреднєй школи зоз домом школярох Петро Кузмяк, означели Шветови дзень туризму, 27. септембер. З тей нагоди реализовали наставну активносц унапрямену на применьованє штучней интелиґенциї у туризму и образованю, котру орґанизовали наставнїци Анико Войчена и Єлена Миркович.
Тогорочна тема Шветового дня туризма була – Диґитална аґенда и штучна интелиґенция за редизайнованє туризму, а отворела простор за упознаванє школярох зоз можлївосцами котри сучасни диґитални технолоґиї даваю у планованю путованя, креированю туристичних понуканьох и прилагодзованю услугох потребом розличним профилом путнїкох.
Циль активносци бул же би школяре нє були лєм хаснователє нових технолоґийох, алє же би розвивали диґитални компетенциї, критичнє думанє и професийни схопносци нєобходни за будучносц туризму.
