РУСКИ КЕРЕСТУР/СУБОТИЦА – У Руским Керестуре вчера, 28. мая, трицец тройо школяре другей класи ОШ шветочно прияли Першу святу причасц на Дзецинскей Служби Божей на 11,30 годзин, а дзень пред тим першираз ступели и до Святей тайни споведзи.
Службу служели капелан о. Михайло Шанта и парох о. Михайло Малацко, котри и наказовал, а капелан о. Владимир Медєши споведал. Парох наглашел же тота шветочна подїя їх перши крочай як членох Церкви, а барз значни и тот други крочай – и надалєй ходзиц на богослуженя и причащац ше.
Першопричашнїки виведли и кратку програму, после хторей була процесия „Святу” зоз Святима тайнами, у хторей участвовали домашнї священїки и першопричашнїки. Першопричашнїки достали и спомини на тоту значну подїю у їх християнским живоце.
Дзеци за Першу причасц пририхтали вироучительки ш. Вероника и панїматка Златица Малацко, а на шветочносци присуствовали и їх учительки у ОШ Наталия Зазуляк и Мелания Рамач, як и найблїзши члени фамелийох першопричашнїкох.
Церква була шветочно украшена, а шветочносц зоз шпиваньом возвеличала и шпивацка ґрупа, хтору предводзи Лидия Пашо.
